პოლიტიკა

პრეზიდენტი - ლაშა თორდიას საქმეზე: გავიდა რამდენიმე კვირა და არანაირი პასუხი არ არსებობს კომიკური პიარომის გარდა

პრეზიდენტი გიორგი მარგველაშვილი და პრეზიდენტის ადმინისტრაციის ხელმძღვანელი გიორგი აბაშიშვილი, სახელმწიფო აუდიტის სამსახურში გენერალურ აუდიტორს, ლაშა თორდიას შეხვდნენ.

შეხვედრა დახურულ კარს მიღმა გაიმართა.

როგორც პრეზიდენტმა შეხვედრის დასრულების შემდეგ, სახელმწიფო აუდიტის სამსახურის თანამშრომლებთან გამართულ შეხვედრაზე განაცხადა, ოთარ ფარცხალაძესა და ლაშა თორდიას საქმეში დღემდე არანაირი პასუხის არ არის, „კომიკური პიარომის გარდა“.

„უკვე მერამდენედ მიხდება სახელმწიფო ინსტიტუტების დაცვა, იმ ვითარებაში როდესაც, სამწუხაროდ, რაღაცა გაუგებრობებთან გვაქვს საქმე. ის, რაც მოხდა რამდენიმე კვირის წინ, ამას სჭირდება ნათელი და პირდაპირი პასუხი. ჩვენ დღეს ვხედავთ სამწუხაროდ ერთი და იგივე ტენდენციას, მოხდება რაღაც პრობლემური, შემდეგ ხდება ამის რაღაცნაირი შეფუთვა, ჩაფარცხვა, გადაპიარება თუ რა შეიძლება ამას დაერქვას. ამის მერე ვხედავთ იმას, რომ არა მარტო კონკრეტული პრობლემები პასუხგაუცემელია საზოგადოებაში, არამედ კითხვის ნიშნები ისმის უმნიშვნელოვანეს კონსტიტუციური სახელმწიფოებრივი ინსტიტუტების დაცულობასთან მიმართებაში.

დღეს, როდესაც გავიდა რამდენიმე კვირა და არანაირი პასუხი არ არსებობს კომიკური პიარ ომის გარდა, მე ვკითხულობ, როდემდე უნდა ველოდოთ პასუხებს ამ თემებზე. ნებისმიერ ასეთ სიტუაციაში ჩვენს სამართალდამცავებს, სადაც მუშაობს ათასობით კვალიფიციური კადრი, ჩვენ მივეცით მათ მაღალი ლეგიტიმაცია, მივეცით მათ უფლება ატარონ გამოძიება, მივეცით მათ რეალურად საზოაგდოებას გააცნონ, რა მოხდა და როგორ მოხდა“,-განაცხადა პრეზიდენტმა.

მისი თქმით, „ვიდეო კასეტებით ომი კი არ უნდა იყოს, აქ სახელმწიფო ინსტიტუტის დაცვა უნდა იყოს“.

„ეს არის ჩვენი ქვეყნის იმიჯი, რომელზეც პასუხისმგებელი ვართ ჩვენს მოქალაქეებთან და რომელზეც პასუხისმგებელი ვართ ქვეყნის გარეთ,“ - აღნიშნა გიორგი მარგველაშვილმა.

მისი თქმით, იგი მოთმინებით ელოდება მომხდარის ადეკვატურ შეფასებას და არა პოლიტიკოსების განცხადებებს.

„ძალიან მოთმინებით ველი რაიმე ადეკვატურ შეფასებებს და არა პოლიტიკოსების განცხადებებს გულზე მჯიღის ცემით. მდაბიო პიარ ომი, რომლის მაყურებელიც საზოგადოება გახდა. საზოგადოებისთვის არის გაკეთებული ეს პიარ ომი. ვიდეოებით ომი, საზოგადოებისთვის აქცენტის გაკეთების იმედია. იმედია, რომ საზოგადოებაში იტყვიან, მოდით, რა თვალი დავხუჭოთ. იმედია, რომ ქართულ საზოგადოებას არ ესმის, რომ ინსტიტუტი არის მნიშვნელოვანი, რომ სახელმწიფო არის მნიშვნელოვანი და შევა ამ ჭორაობაში, და თვალს დახუჭავს მნიშვნელოვანზე“, - განაცხადა მარგველაშვილმა.

მონიკა დავლიანიძე