პოლიტიკა

პრეზიდენტი ფიქრობს,რომ 20-მდე პარტიების თუ პარტიტუნების ლიდერად გამოცხადდება - სალომე ზურაბიშვილი

საკონსტიტუციო ცვლილებებზე მომუშავე კომისიის წევრი, დეპუტატი სალომე ზურაბიშვილი პრეზიდენტის მიერ გაკეთებულ განცხადებას გამოეხმაურა.

„ეს განცხადება იურიდიულად გაუმართავი და გაუმართლებელია, რადგან ამით პრეზიდენტი პირდაპირ იჭრება საკანონმდებლო ორგანოს კომპეტენციაში. პრეზიდენტი პარლამენტის საქმიანობის კონკურენტად გვევლინება, რაც საკმაოდ უცნაური არის იმ პირისგან, რომლის პირველი მოვალეობა კონსტიტუციის დაცვაა. მეორე, რაც ჩემთვის ასევე უცნაურია, მის განცხადებაში ფაქტობრივი უზუსტობებიც არის.

როდესაც ის აცხადებს, რომ ეს „ოცნების“ მომზადებული ტექსტი არის. მე ვესწრებოდი კომისიას, ამ კომისიაში მონაწილეობდნენ არასამთავრობოები, ექსპერტები, ოპოზიციური პარტიების წარმომადგენლები, სანამ ბოიკოტს გამოაცხადებდნენ. ეს ყველაფერი არ ითვლება, და თურმე „ოცნების“ პროექტი არის.

ეს არის პარლამენტში შემუშავებული პროექტი, რომელიც ორი მოსმენით დამტკიცდა და იმედი მაქვს, მალე მესამე მოსმენითაც დამტკიცდება. ყველაზე სამწუხარო არის ის, რომ ამით ძალიან ნათლად გვიჩვენებს პრეზიდენტი, რომ ის პოლიტიკურ თამაშებში ბოლომდე არის ჩაძირული. ამ ბოლო ნაბიჯით ის ფიქრობს,რომ 20-მდე პარტიების თუ პარტიტუნების ლიდერად გამოცხადდება და ამით ახალ პოლიტიკურ როლს შეიძენს“,-განაცხადა სალომე ზურაბიშვილმა პარლამენტის პლენარულ სხდომაზე.

მონიკა დავლიანიძე