პოლიტიკა

პრეზიდენტი დეკანოზ გიორგი მამალაძის საკითხს გამოეხმაურა

საქართველოს პრეზიდენტი გიორგი მარგველაშვილი ამბობს, რომ დეკანოზ გიორგი მამალაძის შეწყალების მოთხოვნის წარმოდგენის შემთხვევაში საკითხს გაეცნობა და პატრიარქის პოზიციასაც გაიზიარებს. ამის შესახებ პრეზიდენტმა გადაცემა „პოლიტმეტრში“ ისაუბრა.

პრეზიდენტმა აღნიშნა, რომ საქმის მასალებს დეტალურად არ იცნობს, თუმცა მიიჩნევს, რომ პოლიტიკოსების მხრიდან პოზიციების დაფიქსირება არასწორი იყო მაშინ, როცა დეკანოზი იზოლირებული იყო, ხოლო მის ადვოკატებს საქმესთან დაკავშირებით დეტალებზე საუბრების აკრძალვა ჰქონდათ.

–„ამ საკითხთან დაკავშირებით ბევრი ემოცია დაგროვდა. მე მის უწმინდესობას ვესაუბრე და ჩემი პოზიცის გავუზიარე სინოდის წევრებსაც, რომ კარგი იქნება თუ ტემპერატურას დავწევთ. მაშინვე დავაფიქსირე, რომ ამ საქმეს გრიფი საიდუმლო აქვს დადებული და არაერთი საშუალო, უმაღლესი თუ ზემდეგი პოლიტიკოსი აფიქსირებდა პოზიციას, მაშინ როცა მამალაძე იყო იზოლირებული და ვერაფერს ამბობდა და მის ადვოკატებსაც ჰქონდათ აკრძალვა. პოლიტიკურ პროცესთან, რაც ხდებოდა მე კითხვები არ გამჩენია და ვთქვი, რომ იყო თანაბარი პირობების დარღვევა მამალაძისთვის. ამის იქით მე საქმის დეტალებს არ გავცნობივარ“- განაცხადა მარგველაშვილმა

პრეზიდენტის თქმით, შეწყალების უფლება პოლიტიკის მიღმაა და არ უნდა ჩართო ამ პოლიტიკურ ორომტრიალში. მისივე თქმით, ის შეეცდება ეს პროცესი განიხილონ არა იმის მიხედვით ვინ რა პოლიტიკურ თამაშს თამაშობს, არამედ უმაღლესი სულიერი თუ მორალური სტანდარტებიდან გამომდინარე.

ცირა გურგენიძე