სამართალი

პრეზიდენტი აქტიურად აპირებს ჩაერთოს მოსამართლეების საკითხის გარშემო ინფორმაციის მოძიებაში- ფიქრია ჩიხრაძე

საქართველოს პრეზიდენტის პოლიტიკურ საკითხებში მრჩეველის ფიქრია ჩიხრაძის განცხადებით, პრეზიდენტი აქტიურად ჩაერთვება უზენაესი სასამართლოს ორ მოსამართლეზე, პაატა ქათამაძესა და ბესარიონ ალავიძეზე განხორციელებული შესაძლო ზეწოლასთან დაკავშირებით ინფორმაციის მოძიებაში.

„წინასწარ ვერაფერს გეტყვით. ვიტყვი ერთ რამეს, რომ პრეზიდენტი ძალიან აქტიურად აპირებს ჩაერთოს ამ საკითხის გარშემო ინფორმაციის მოძიებაში და ყველა იმ ღონისძიებაში, რომელიც ამ გაჩენილ კითხვის ნიშნებს პასუხს გასცემს. ეს არის ძალიან რთული თემა, როდესაც მოსამართლეები ლაპარაკობენ გარკვეულ ზეწოლაზე და ეს მითქმა-მოთქმა კი აღარ არის, არამედ, არის უკვე ოფიციალური პროცესი. ბუნებრივია, პრეზიდენტი ძალიან აქტიური იქნება და ის ყოველთვის იცავდა და დაიცავს მოსამართლეებს“,- განაცხადა ჩიხრაძემ.

უზენაესი სასამართლოს მოსამართლეებმა, პაატა ქათამაძემ და ბესარიონ ალავიძემ მთავარ პროკურატურას მათზე განხროციელებული ზეწოლის გამო 14 იანვარს მიმართეს.

გამოძიება სამართალწარმოების განხორციელებაზე ზეგავლენის მიზნით მათ საქმიანობაში უხეში ჩარევის შესაძლო ფაქტის საფუძველზე აღიძრა.

„მთავარი პროკურატურის საგამოძიებო ნაწილში საქართველოს უზენაესი სასამართლოს მოსამართლეების, ბესარიონ ალავიძის და პაატა ქათამაძის განცხადებისა და სასამართლოს მომართვის საფუძველზე დაიწყო გამოძიება სამართალწარმოების განხორციელებაზე ზეგავლენის მიზნით ხსენებული მოსამართლეების საქმიანობაში უხეში ჩარევის შესაძლო ფაქტზე, საქართველოს სისხლის სამართლის კოდექსის 364-ე მუხლის მე-2 ნაწილით გათვალისწინებული დანაშაულის ნიშნებით“, - ნათქვამია პროკურატურის განცხადებაში.

პაატა ქათამაძე და ბესარიონ ალავიძე უზენაესი სასამართლოს დიდი პალატის წევრები არიან. უზენაეს სასამართლოში რუსთავი 2-ის საქმე სწორედ დიდ პალატას აქვს გადაცემული.

საკითხთან დაკავშირებით ტელეკომპანია რუსთავი2-ის გენერლურმა დირექტორმა ნიკა გავრამიამ საგანგებო ბრიფინგზე საქართველოს პრეზიდენტს მიმართა, რომ ის აღნიშნული საქმით დაინტერესდეს.

მონიკა დავლიანიძე