პოლიტიკა

პრეზიდენტი აპირებს ხვალ „იბერია ტვ“-ის წარმომადგენლებს შეხვდეს

ტელეკომპანია” იბერიამ” მორიგი განცხადება გაავრცელა.

ტელეკომპანიის ცნობით, ფინანსურ საკითხებთან დაკავშირებით კომპანია „ომეგა ჯგუფმა“ განაცხადა, რომ წარმოშობილი ფინასური დავალიანება შექმნილია ხელოვნური დაბრკოლებების გამო მთავრობის მხრიდან. კომპანიის მტკიცებით, „არაა საუბარი, რომ ვინმე არ აპირებს დავალიანების გადახდას“.

„ომეგა ჯგუფმა“ ფინანსთა სამინისტროსგან მოითხოვა ვალის რესტრუქტურიზაცია, თუმცა ამ დროისთვის აღნიშნული შეთანხმება მიღწეული არაა.

„იბერია ტვ“-ის ინფორმაციით, გუშინ გამოქვეყნებული სატელეფონო ჩანაწერი, რომელშიც სავარაუდოდ, სპორტის ყოფილი მინისტრი ლევან ყიფიანი ტელეკომპანია „იბერიისა“ და „ომეგა ჯგუფის“ დამფუძნებელ ზაზა ოქუაშვილს ესაუბრება, ერთადერთი არაა. „ომეგა ჯგუფის“ მტკიცებით, მათ არაერთი საუბარი ჰქონდათ ხელისუფლების მოქმედ თუ ყოფილ მაღალჩინოსნებთან, რომლებიც ეხება ტელეკომპანია „იბერიაზე“ ზეწოლას, მის დათმობასა და ამ გზით პრობლემების მოგვარებას.

„იმის გათვალისწინებით, რომ ქართული მართლმსაჯულების მიმართ არსებობს გარკვეული ეჭვები, შემდეგი გადაწყვეტილებაა მიღებული, რომ სამართლებრივი დავა გაგრძელდება არა საქართველოში, არამედ გაერთიანებულ სამფოში და გარკვეული მასალები უკვე გადაგზავნილია ამ საქმის ირგვლივ“, - განაცხადა იბერიის საინფორმაციო გამოშვების წამყვანმა ბექა პატურაშვილმა.

მისივე ინფორმაციით, იბერიის ირგვლივ მიმდინარე ამბებით დაინტერესებულია საქართველოს პრეზიდენტის ადმინისტრაცია, ხოლო თავად გიორგი მარგველაშვილი გეგმაცს, ხვალ შეხვდეს ტელეკომპანიის წარმომადგენლებს.

ტელეკომპანია „იბერიას“ დღეს სამი საათის განმავლობაში მაუწყებლობა შეწყვეტილი ჰქონდა.

პარასკევს ტელეკომპანიის ჟურნალისტებმა საგანგებო განცხადება გაავრცელეს, რომელშიც აღნიშნულია, რომ ხელისუფლებამ „იბერიას“ გადაუკეტა დაფინანსების მთავარი წყარო. კერძოდ, კომპანია ,,ომეგა ჯგუფი“, რომლის შემადგენლობაშიც შედის ტელეკომპანია ,,იბერია“, პარალიზებულია. ტელეკომპანიის განცხადებით, ხელისუფლებამ წარმოება მიზანმიმართულად გააჩერა.

ფინანსთა სამინისტროს ცნობით, „ომეგა ჯგუფში“ შემავალი სიგარეტის მწარმოებელი კომპანია შპს „ოჯთ“ არის ერთადერთი კომპანია, რომელსაც ბიუჯეტის წინაშე 50 მილიონ ლარზე მეტი ვალი ერიცხება, რომლის ძირითად ნაწილს შეადგენს თამბაქოს ნაწარმზე აქციზის გადასახადის გადაუხდელობა. თანხის გადაუხდელობის გამო კი, ამჟამად, კომპანიის მიმართ გავრცელებულია იძულებითი ღონისძიებები – ინკასო და ყადაღა.