პოლიტიკა

პრემიერს ვთხოვეთ, რომ საკანონმდებლო პროცესში ბიზნესი უფრო მეტად იყოს ჩართული და უფრო მეტი კომუნიკაცია იყოს - სოსო ფხაკაძე

ბიზნესასოციაციის ვიცე-პრეზიდენტის, სოსო ფხაკაძის განცხადებით, პრემიერ-მინისტრ გიორგი კვირიკაშვილს მოეწონა მათი კვლევის - „საქართველოს ბიზნესგარემო კერძო სექტორის თვალით“ შედეგების პრეზენტაცია.

„ძალიან გვიხარია, რომ პრემიერმა მოიწონა ჩვენი კვლევის პრეზენტაცია და სურვილი გამოთქვა, მომავალ წელსაც ასეთი პრეზენტაცია გავაკეთოთ. ეს იქნება ერთ-ერთი დოკუმენტი, რომელიც ხელს შეუწყობს ჩვენ შორის კომუნიკაციის უფრო მეტად გაფართოებას და საბოლოო ჯამში, ეს ბიზნესისა და ეკონომიკის განვითარებისთვის იქნება ძალიან მნიშვნელოვანი“, - თქვა ფხაკაძემ საქართველოს პრემიერ-მინისტრსა და ბიზნესასოციაციის წევრებს შორის გამართული შეხვედრის შემდეგ.

ფხაკაძის თქმით, შეხვედრაზე ისაუბრეს ქვეყანაში ჩატარებულ რეფორმებზე.

„ერთ-ერთი არის მოგების გადასახადის რეფორმა, ასევე ევროკავშირთან თავისუფალი ვაჭრობის ხელშეკრულება და ჩინეთთან თავისუფალი ვაჭრობის ხელშეკრულების ხელმოწერის დასრულება. მნიშვნელოვან რეფორმად ითვლება ასევე საპენსიო რეფორმა. როგორც ხელისუფლება, ისე ბიზნესი ამბობს, რომ ორივე მხარემ ერთად უნდა ვიმუშაოთ ძალიან ბევრი, რათა მომავალში უფრო კარგი მომავალი შევქმნათ“, – განაცხადა ფხაკაძემ.

ბიზნესასოციაციის ვიცე-პრეზიდენტმა აღნიშნა, რომ ბიზნესი რეფორმებს დადებითად აფასებს.

ფხაკაძის შეფასებით, ერთ-ერთ გამოწვევად ბიზნესისთვის რჩება ლარის კურსი, რასაც ხელისუფლება იზიარებს.

„ასევე საუბარი გვქონდა საკანონმდებლო სისტემის უფრო მეტ სტაბილურობაზე. ჩვენი თხოვნა იყო, რომ ამ პროცესში ბიზნესი უფრო მეტად იყოს ჩართული და უფრო მეტი კომუნიკაცია იყოს“, – აღნიშნა სოსო ფხაკაძემ.

საქართველოს პრემიერ-მინისტრი გიორგი კვირიკაშვილი ბიზნესასოციაციის წევრებს დღეს შეხვდა.

ღონისძიებას, ეკონომიკური გუნდის მინისტრებთან ერთად, დედაქალაქის მერი კახა კალაძეც ესწრებოდა.