პოლიტიკა

პრაღის შეხევდრაზე ხაზგასმით იქნება განხილული საბაჟო მონიტორინგის საკითხი - ზურაბ აბაშიძე

პრაღაში აბაშიძე-კარასინის მორიგი შეხვედრის ფარგლებში, საბაჟო მონიტორინგის საკითხის განხილვა იგეგმება, რომელთან დაკავშირებით რუსეთსა და საქართველოს შორის შეთანხმება, ჯერ კიდევ 2011 წელს გაფორმდა.

ამის შესახებ მთავრობის სხდომის დასრულების შემდეგ რუსეთთან ურთიერთობის საკითხში პრემიერის სპეციალურმა წარმომადგენელმა ზურაბ აბაშიძემ განაცხადა.

„პრაღაში ჩვენ ჩვენი დღის წესრიგი გვაქვს. იგი ეხება კონკრეტულ საკითხებს,როგორიც არის სავაჭრო-ეკონომიკური ურთიერთობები, სატრანსპორტო კავშირები, გარკვეული ჰუმანიტარული საკითხები. ამ შეხვედრაზე ჩვენ გვინდა ხაზგასმით განვიხილოთ საბაჟო მონიტორინგის თაობაზე 2011 წელს ხელმოწერილი შეთანხმების საკითხი. ჩვენ დაინტერესებულნი ვართ, რომ დაჩქარდეს მაქსიმალურად ამ შეთანხმების იმპლემენტაცია“,-აღნიშნა აბაშიძემ.

კითხვაზე, წინა მოლაპარაკების ეტაპის შემდეგ, ამ მიმართულებით რა გაკეთდა, აბაშიძემ უპასუხა, რომ შვეიცარული მხარე იმყოფებოდა როგორც საქართველოში, ისე რუსეთში, ამ საკითხზე მოლაპარაკების მიზნით.

„გადაიდგა გარკვეული ნაბიჯები, ამ პროცესში ჩართული არიან ჩვენი შვეიცარიელი კოლეგები, იმყოფებოდნენ აქ, ასევე მოსკოვში. მათთან მუდმივ კავშირში ვიმყოფებით, გარკვეული საკითხები იყო დასაზუსტებელი, მგონი ეს ყველაფერი დაზუსტდა და ჩვენ ახლა ველოდებით ფინალურ ეტაპს. ჩვენ ძალიან დაინტერესებული ვართ, რომ ეს ყველაფერი დასრულდეს“, - განაცხადა აბაშიძემ.

მონიკა დავლიანიძე