პოლიტიკა

პოროშენკომ საჯაროდ აღიარა, რომ მისი მთავარი პრობლემა მე ვარ - მიხეილ სააკაშვილი

საქართველოს ექს-პრეზიდენტისა და ოდესის ყოფილი გუბერნატორის, მიხეილ სააკაშვილის განცხადებით, უკრაინის პრეზიდენტმა მისთვის მოქალაქეობის ჩამორთმევით აღიარა, რომ სააკაშვილი მისთვის მთავარ პრობლემას წარმოადგენს. ამის შესახებ მიხეილ სააკაშვილმა „კურიერთან“ ექსკლუზიურ ინტერვიუში ისაუბრა.

სააკაშვილის თქმით, მისთვის უკრაინის მოქალაქეობის ჩამორთმევის საკითხი ურეკში, პოროშენკოსა და ივანიშვილის ფარულ შეხვედრაზე გადაწყდა.

„ოლიგარქისთვის, რომელიც მართავს უკრაინას პოროშენკოს სახით, ახმეტოვისა და სხვებისთვის - მათთვის ეჭვს არ წარმოადგენდა არასდროს, რომ მათი მთავარი პრობლემა ვიყავი მე, უბრალოდ ახლა საჯაროდ განაცხადეს და ეს უკვე ნათელი გახდა უკრაინისთვის, რომ ერთი მხრივ, არიან ესენი: პოროშენკო, ახნმეტოვი, ავაკოვიეს მთელი ბანდიტების კორპორაცია, რომელიც მათ უკავშირდება და მეორე მხარეს არიან ის ახალი ძალები, რომელიც მე შევკარი, ერთად გავაერთიანე და, რა თქმა უნდა, რაღაც რეპრესია მოსალოდნელი იყო.

მე პატარა ბავშვი არ ვარ, საქართველოში ტყუილად არ ჩავიდა, ივანიშვილს ტყუილად არ შეხვდა, ბათუმში ტყუილად არ მოინდომა ჩასვლა იმიტომ, რომ ურეკში შევლა უნდოდა, ტყუილად არ ილაპარაკეს დიდი ხანი, რა თქმა უნდა, რაღაც ნაბიჯს გადადგამდნენ“, - უთხრა სააკაშვილმა „კურიერს“.

სააკაშვილის თქმით, მას უკრაინაში ჰყავს ძლიერი ორგანიზაცია, რომლის მიზანია უკრაინის ხელისუფლების შეცვლა.

„ამ ოლიგარქებისთვის მე ვიქეცი სამკვდრო-სასიცოცხლო საფრთხედ, რომელსაც ბოლომდე შეებრძოლებიან. მაგრამ, რაც უფრო მეტად შემებრძოლებიან, მით უფრო მეტად შევებრძოლები და გავძლიერდები. უკრაინაში მე მყავს ძალიან ძლიერი ორგანიზაცია, 100 000 აქტივისტი მარტო ჩემს ორგანიზაციაში, 26 რეგიონში დიდი შტაბები. ახალგაზრდების ძალიან საინტერესო ქსელი, კონკრეტულ სფეროში მოღვაწე ადამიანების, ბიზნესმენების - ეს ხალხი არსად არ გაქრება, ამ ხალხთან ერთად ჩვენ ვაპირებთ უკრაინის ხელისუფლების შეცვლას“, - თქვა სააკაშვილმა.

ოდესის ყოფილი გუბერნატორის განცხადებით, არც უკრაინას, არც საქართველოს ხელისუფლებებს მისი ამ ქვეყნებში ჩასვლა არ აწყობთ. მისი თქმით, სწორედ ამის გამო მოქალაქეობა ჩამოართვეს მაშინ, როცა ის უკრაინაში არ იმყოფებოდა.

„ჩემი ინფორმაციით, როცა ის [პოროშენკო] იყო საქართველოში ჩასული, ივანიშვილთან ურეკში, ილაპარაკეს იმ თემებზე. პრობლემა ისაა, რომ ივანიშვილსაც არ სჭირდება ჩემი საქართველოში ჩაყვანა, ამიტომ ეს გააკეთა მაშინ, მე როცა არ ვიყავი უკრაინაში, იმიტომ , რომ ვყოფილიყავი უკრაინაში, მაშინ უნდა ყოფილიყო ექსტრადაციაზე ლაპარაკი, საქართველოსთვის გადაცემა. მაგრამ საქართველოს ჩემი გადმოცემა არ სჭირდება, იმიტომ რომ, როგორც უკრაინასი ჩემი ჩასვლა პოროშენკოსთვის ნიშნავს დამხობას, საქართველოშიც იგივე იქნება“, - თქვა სააკაშვილმა.

შეგახსენებთ, 26 ივლისს გახდა ცნობილი, რომ მიხეილ სააკაშვილს უკრაინის მოქალაქეობა ჩამოართვეს. როგორც უკრაინის პრეზიდენტის ადმინისტრაციამ „ინტერფაქს-უკრაინას“ მისწერა, მიზეზი გახდა სააკაშვილის მიერ მოქალაქეობის განაცხადის შევსებისას მიწოდებული „არასაიმედო“ ინფორმაცია. ადმინისტრაციის თქმით, პეტრო პოროშენკოს აღნიშნული განკარგულება არ გამოქვეყნდება, რადგან პერსონალურ მონაცემებს შეიცავს, რომელთა გასაჯაროება დაუშვებელია კანონით.

ანა მებურიშვილი