სამართალი

პოლიციელზე თავდასხმის ბრალდებით დაკავებულ ანზორ კვარაცხელიას 4 წლითა და 6 თვის ვადით თავისუფლების აღკვეთა მიესაჯა

პოლიციელზე თავდასხმის ბრალდებით დაკავებული ანზორ კვარაცხელია, რომელსაც პოლიციელების მისამართით ე.წ. მოლოტოვის კოქტეილის სროლას ედავებიან, სასამართლომ დამნაშავედ ცნო. მოსამართლე ჯვებე ნაჭყებიას გადაწყვეტილებით, მას 4 წლითა და 6 თვის ვადით თავისუფლების აღკვეთა მიესაჯა.

მოსამართლის განმარტებით, განაჩენი სრულად შეესაბამება უზენაესი სასამართლის სტანდარტს, არ იყო მარტივი საქმე, რომელსაც განაჩენში უნდა გაეცეს პასუხი.

ბრალდებულმა ისარგებლა საბოლოო სიტყვის უფლებითაც.

"დიდი მადლობა რომ შეწუხდით და ჩემს საქმეებზეც დადიხართ. ახლა მინდა ვთქვა, რომ არსებითი მნიშვნელობა არ აქვს, რამდენს მომისჯით, იქიდან გამომდინარე, რომ დღეს ძალიან ამაყი ვარ, ჩემი ქვეყნის გვერდით რომ ვიდექი. რაც შეეხება ჩემს საქმეს, ეს საქმე არის შეკერილი, ვერც თავი გავივე და ვერც ბოლო, რას და რატომ მედავებიან.

ერთ რაღაცას გეტყვით, დედიკოს მიმიხედეთ, როცა ჩამოვა, რადგან ემიგრანტი მყავს.

გკოცნით და ძალიან მიყვარხართ",- განაცხადა კვარაცხელიამ.

ცნობისთვის, ანზორ კვარაცხელიას ბრალი სისხლის სამართლის კოდექსის 353-ე პრიმა მუხლის პირველი ნაწილით წაუყენეს, რაც პოლიციელზე თავდასხმას გულისხმობს.