სამართალი

პოლიციამ დააკავა პირი, რომელიც სავარაუდოდ, მონაწილეობდა უცხოელი დამკვირვებლის ფიზიკურ შეურაცხყოფაში - შალვა ხუციშვილი

შს მინისტრის მოადგილემ, შალვა ხუციშვილმა ჟურნალისტებთან განმარტება გააკეთა არჩევნების მეორე ტურის დღეს გორსა და 8 ოქტომბერს ჯიხაშკარში მომხდარ ინციდენტებთან დაკავშირებით მიმდინარე გამოძიებაზე.

როგორც ხუციშვილმა ჟურნალისტებს უწყებათაშორისო კომისიის სხდომის ფარგლებში განუცხადა, გორის ინციდენტთან დაკავშირებით, რა დროსაც, სობისის საარჩევნო უბანზე ,,ნაციონალური მოძრაობის’’ მხარდამჭერს სცემეს, 7 პირია გამოკითხული.

რაც შეეხება ჯიხაშკარის ინციდენტს, რა დროსაც საარჩევნო უბნების დარბევა მოხდა, მინისტრის მოადგილის ინფორმაციით, დაკავებულია კიდევ ერთი პირი.

,,გორთან დაკავშირებით გამოძიება მიმდინარეობს და დაახლოებით 7 პირია გამოკითხული. დანიშნულია ექსპერტიზები. ექსპერტიზაზე ვართ დამოკიდებული, მაგრამ მე ვფიქრობ, რომ სადღაც მომავალ სხდომამდე ჩვენ გვეცოდინება დაახლოებით, რა მოხდა და რა სამართლებრივი შედეგები შეიძლება დადგეს.

რაც შეეხება ჯიხაშკარს, გუშინ პოლიციამ დააკავა კიდევ ერთი პირი, რომელიც სავარაუდოდ, მონაწილეობდა უცხოელი დამკვირვებლის ფიზიკურ შეურაცხყოფაში. ამ პირის დაკავება მოხდა ახლა მხოლოდ იმიტომ, რომ უცხოელი დამკვირვებელი ანუ დაზარალებული ვინც იყო, ამოცნობა მან მოახერხა მხოლოდ ახლა. ის ფიზიკურად საქართველოში არ იყო და როდესაც მეორე ტურისთვის ჩამოვიდა, მხოლოდ მაშინ მოახერხა ამ პირის ამოცნობა’’, - განუცხადა ჟურნალისტებს შალვა ხუციშვილმა.

ნინო ექვთიმიშვილი