სამართალი

პოლიცია უკანონოდ კი არ იქცევა, პრობლემა ის არის, რომ ისინი კანონიერად იქცევიან - იაგო ხვიჩია

პოლიტიკური ცენტრის „გირჩის“ წევრის იაგო ხვიჩიას განცხადებით, პარტიის წევრებისთვის მოულოდნელი არ ყოფილა, რომ მათ ოფისში დღეს შს სამინისტროს წარმომადგენლები ჩხრეკის ჩასატარებლად მივიდნენ.

როგორც ხვიჩიამ პირდაპირ ეთერში განაცხადა, საგამოძიებო ორგანოების წარმომადგენლები უკანონოდ არ იქცევა, პრობლემა სწორედ იმაშია, რომ ისინი კანონიერად იქცევიან.

„აქ არაფერი მოულოდნელი არ ყოფილა. მინდა ხაზი გავუსვა იმ გარემოებას, რომ საქართველოს საგამოძიებო ორგანოები, პოლიცია, უკანონოდ კი არ იქცევა, პრობლემა ის არის რომ ისინი კანონიერად იქცევიან, ანუ ჩვენ ვაპროტესტებთ არა იმას,რომ ვიღაცა უკანონოდ გვექცევა, არამედ იმას, რომ კანონი აძლევს ასე მოქცევის საშუალებას. აქედან გამომდინარე, მათ შეეძლოთ შემოსულიყვნენ 1,2,3-ში , ან 7-ში, შემოსულიყვნენ ზეგ, ან მაზეგ, ამას პრინციპული მნიშვნელობა არ აქვს. ფაქტია, რომ ეს უნდა მომხდარიყო. მოხდა. აქ არანაირი პრობლემა არ არის. ამ აქციის მთავარი დანიშნულებაც ის იყო, რომ სამართალდამცავ ორგანოებს ჩვენთვის „ყურადღება“ მიექციათ. ყურადღება მოგვაქციეს და ვნახოთ, სადამდე წავა ყურადღების მიქცევა და საბოლოო ჯამში რა შეუძლია სამართალდამცავ ორგანოებს სამოქალაქო პროტესტის წინააღმდეგ“,-აღნიშნა ხვიჩიამ.

შეგახსენებთ, რომ „გირჩის“ წარმომადგენლებმა ნარკოპოლიტიკის ლიბერალიზაციის მოთხოვნით, 31 დეკემბერს თავიანთ ოფისში მარიხუანა პირდაპირ ეთერში დათესეს.

მონიკა დავლიანიძე