პოლიტიკა

პოლიტიკოსებს შორის ყველაზე დადებითად აფასებენ დავით ბაქრაძეს, საქართველოს პრეზიდენტსა და თბილისის მერს - IRI

„საერთაშორისო რესპუბლიკური ინსტიტუტის“ (IRI) ახალი კვლევის თანახმად, გამოკითხულებს პოლიტიკოსებს შორის ყველაზე კარგი დამოკიდებულება „ევროპული საქართველოს“ ლიდერის, დავით ბაქრაძის მიმართ აქვთ. კვლევის მონაწილეთა 53%-მა ის დადებითად შეაფასა, 40%-მა - უარყოფითად, 2%-ს საერთოდ არ სმენია მის შესახებ, ხოლო 5%-მა უპასუხა, რომ არ იცის.

მეორე ადგილზეა საქართველოს პრეზიდენტი გიორგი მარგველაშვილი. გამოკითხულთა 52%-მა ის დადებითად შეაფასა, 42%-მა - უარყოფითად, 1%-ს საერთოდ არ სმენია მის შესახებ, ხოლო 5%-მა განაცხადა, რომ არ იცის.

თბილისის მერი კახა კალაძე გამოკითხულთა 50%-მა დადებითად შეაფასა, 44%-მა -უარყოფითად, 2%-ს მასზე საერთოდ არ სმენია, ხოლო 4%-მა განაცხადა, რომ არ იცის.

შრომის, ჯანმრთელობისა და სოციალური დაცვის მინისტრი დავით სერგეენკო გამოკითხულთა 49%-მა დადებითად შეაფასა, 39%-მა - უარყოფითად, 5%-ს მასზე არ სმენია, ხოლო 7%-მა უპასუხა, რომ არ იცის.

ხუთეულში მოხვდა საქართველოს პრემიერ-მინისტრი გიორგი კვირიკაშვილი. გამოკითხულთა 41%-მა ის დადებითად შეაფასა, 52%-მა - უარყოფითად, მასზე არ სმენია 2%-ს, ხოლო 5%-მა უპასუხა, რომ არ იცის.

კვლევა ჩაატარა ბალტიის კვლევების/გელაპის ორგანიზაციამ საერთაშორისო რესპუბლიკური ინსტიტუტის კვლევების ცენტრის დავალებით. მონაცემთა შეგროვება მოხდა 2018 წლის 10-22 აპრილის შუალედში და გამოიკითხა საარჩევნო უფლების მქონე 1 500 საქართველოს მოქალაქე. რესპონდენტთა გამოპასუხების პროცენტია 71, ხოლო ცდომილების ზღვარია +/- 2.5 %.