პოლიტიკა

პლენარულ სხდომაზე ემზარ კვიციანმა გიგა ბოკერიას ჭიქა ესროლა (ვიდეო)

პარლამენტის პლენარულ სხდომაზე დეპუტატებს ემზარ კვიციანსა და გიგა ბოკერიას შორის დაპირისპირება მოხდა.

კამათი მოყვა ვახტანგ გომელაურის სიტყვით გამოსვლის შემდეგ სხდომის დახურვის საკითხს.

ანგარიშის მოსმენის დახურვის საკითხზე მსჯელობისას ,,საქართველოს პატრიოტების’’ წევრმა, ემზარ კვიციანმა განაცხადა, რომ არანაირი მნიშვნელობა არ ჰქონდა, სხდომა ღია რეჟიმში ჩატარდებოდა.

„რა მნიშვნელობა აქვს ღია იქნება თუ დახურული, როდესაც უცხო ქვეყნის რეზიდენტი გიგა ბოკერია გვიზის აქ, გინდ გახსენი და გინდ დახურე“, - განაცხადა ემზარ კვიციანმა.

ამ განცხადებას ოპოზიციონერი დეპუტატების მხრიდან სიცილი, უშუალოდ ბოკერიას მხრიდან კი კვიციანის მისამართით შეურაცხმყოფელი რეპლიკა მოყვა, რამაც კვიციანიც გაბრაზება გამოიწვია.

„პატრიოტთა ალიანსის“ წევრმა ბოკერიასთან მისვლა დააპირა, თუმცა ის მანდატურის სამსახურის თანამშრომლებმა შეაჩერეს. მან ბოკერიას მისამართით წყლით სავსე ჭიქა ისროლა.

დაპირისპირების გამო პარლამენტის თავმჯდომარემ სხდომაზე ტექნიკური შესვენება გამოაცხადა.

ნინო ექვთიმიშვილი