პოლიტიკა

პირი, რომელიც ტელეწამყვან ინგა გრიგოლიას ემუქრებოდა, დაკავებულია - შსს

შინაგან საქმეთა სამინისტროს ადამიანის უფლებათა დაცვის დეპარტამენტის დირექტორი ლონდა თოლორაიას ინფორმაციით, პირი, რომელიც ტელეწამყვან ინგა გრიგოლიას ემუქრებოდა, დაკავებულია.

შესაბამისი განცხადება თოლორაიმ ტელეკომპანია ,,პირველის“ ეთერში გააკეთა.

,,მინდა გითხრათ, რომ ამჟამად პირი, რომელიც ქალბატონ ინგას მიმართ ახორციელებდა ამ ქმედებებს, არის უკვე დაკავებული“, - განაცხადა ლონდა თოლორაიამ.

მისივე განმარტებით, თავდაპირველად გამოძიება დაწყებული იყო მუქარის ფაქტზე, თუმცა ბოლო ორი დღის მანძილზე განხორციელებული საგამოძიებო მოქმედებების შედეგად გამოიკვეთა სისხლის სამართლის კოდექსით გათვალისწინებული დანაშაულიც, რომელიც ადევნებას გულისხმობს.

,,რაც შეეხება სანქციებს, მუქარისთვის გათვალისწინებულია თავისუფლების აღკვეთა 1 წლამდე ვადით, ხოლო ადევნება ითვალისწინებს სასჯელის სახედ თავისუფლების აღკვეთას 2 წლამდე ვადით“, - აღნიშნა შსს-ს წარმომადგენელმა.

შეგახსენებთ, რომ ჟურნალისტმა ინგა გრიგოლიამ სოციალურ ქსელში გაავრცელა პოსტი, რომელშიც ამბობს, რომ მის მიმართ უცნობი მამაკაცის მხრიდან 2011 წლიდან ფსიქოლოგიური ძალადობა ხორციელდება.

გრიგოლიას თქმით, აღნიშნული პირი ურეკავს და მოითხოვს მისგან ქონებისა და ფულის დაბრუნებას, მოითხოვს შვილის ნახვას. ინგა გრიგოლიას თქმით, მან არაერთხელ მიმართა შინაგან საქმეთა სამინისტროს, აღიძრა სისხლის სამართლის საქმე, თუმცა ძალადობა არ შეწყვეტილა.

აღნიშნული განცხადების გავრცელების შემდეგ ინგა გრიგოლია თბილისის მთავარ სამმართველოში გამოიკითხა. გამოკითხვაზე ასევე იმყოფებოდნენ „ტვ პირველის“ ოპერატორი და გადაცემა „რეაქციის“ პროდიუსერი.

ნინო ექვთიმიშვილი