პოლიტიკა

პენიტენციური სისტემის რეფორმის საკანონმდებლო პაკეტს პირველი მოსმენით მხარი დაუჭირეს

საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტმა პენიტენციური სისტემის რეფორმის საკანონმდებლო პაკეტს პირველი მოსმენით მხარი დაუჭირა.

„პატიმრობის შესახებ ცვლილების შეტანის შესახებ“ კანონპროექტი და მისგან გამომდინარე კანონპროექტთა პაკეტი კომიტეტის წევრებს სასჯელაღსრულებისა და პრობაციის მინისტრმა, კახა კახიშვილმა წარუდგინა. მომხსენებელმა პენიტენციურ სისტემაში რეფორმირების ვრცელი პრეზენტაცია წარმოადგინა და იმ სიახლეებზე ისაუბრა, რასაც მთავრობის მიერ საკანონმდებლო ინიციატივის წესით მომზადებული საკანონმდებლო პაკეტი მოიცავს.

პენიტენციური სისტემის რეფორმა შემდგომ სიახლეებს ითვალისწინებს:

გათავისუფლებისთვის მომზადების დაწესებულება - პენიტენციურ სისტემაში გათავისუფლებისთვის მომზადების თავისუფლების აღკვეთის ახალი დაწესებულება შეიქმნება, რომელიც გათავისუფლებისთვის მოამზადებს დაბალი ან საშუალო რისკის იმ მსჯავდებულებს, რომელთა გათავისუფლების ვადა 6 თვეს არ აღემატება;

დარჩენილი სასჯელის უფრო მსუბუქი სახის სასჯელით - შინაპატიმრობით შეცვლა. სასჯელაღსრულების და პრობაციის სამინისტროს ადგილობრივ საბჭოს უფლებამოსილება ენიჭება მსჯავრდებულის წერილობითი მოთხოვნის შემთხვევაში და კანონით განსაზღვრული საშეღავათო პერიოდის მოხდის შემდეგ, დარჩენილი სასჯელი უფრო მსუბუქი სახის სასჯელით - შინაპატიმრობით შეუცვალოს;

ტელევიზორით სარგებლობის უფლება - გათავისუფლებისთვის მომზადების დაწესებულებაში განთავსებულ მსჯავრდებულს, ასევე დაბალი რისკის და ნახევრად ღია ტიპის დაწესებულებაში განთავსებულ მსჯავრდებულს უფლება ენიჭება ყოველგვარი ნებართვის გარეშე შეიძინოს პირადი ტელევიზორი ან რადიომიმღები. ხოლო განსაკუთრებული რისკისა და დახურული ტიპის თავისუფლების აღკვეთის დაწესებულებაში მყოფი მსჯავრდებულები ანალოგიური უფლებით სარგებლობას დაწესებულების დირექტორის ნებართვის შემთხვევაში შეძლებენ;

მსჯავრდებულის ავადმყოფობის გამო სასჯელის მოხდისგან გათავისუფლება - ავადმყოფობის გამო გათავისუფლების უფლება ექნება მხოლოდ სასამართლოს, რომელიც სასჯელის შემდგომი მოხდისგან გაათავისუფლებს მსჯავრდებულს, რომლის ჯანმრთელობის მდგომარეობა შეუსაბამოა სასჯელის მოხდასთან ან/და ჯანმრთელობის მდგომარეობის არსებითი გაუმჯობესება არ არის მოსალოდნელი;

უმაღლესი განათლება - მსჯავრდებულს, რომელიც გათავისუფლებისათვის მომზადების ან დაბალი რისკის თავისუფლების აღკვეთის დაწესებულებაში იმყოფება, უფლება ექნება ისარგებლოს აკადემიური უმაღლესი განათლების პირველ საფეხურზე განათლების მიღების უფლებით;

დისციპლინარული პატიმრობა - აღნიშნული პატიმრობის ვადა მცირდება 60 დღე-ღამემდე. აგრეთვე დისციპლინარული პატიმრობა არ გამოიყენება იმ ქალ მსჯავრდებულებზე, რომლებიც არიან ორსულად ან ქალთა სპეციალურ დაწესებულებაში ჰყავთ 3 წლამდე ბავშვი;

პირობით ვადამდე გათავისუფლება;

მსჯავრდებულთა საშიშროების რისკის შეფასება და გადაფასება;

პენიტენციური დაწესებულების გარე პერიმეტრი.

ცვლილებების პაკეტის გაცნობის შემდეგ მინისტრმა კომიტეტის წევრების და სახალხო დამცველის წარმომადგენლის შეკითხვებს უპასუხა და დამატებითი განმარტებები გააკეთა.

პარლამენტის წევრებმა წარმოდგენილი ცვლილებების პროექტი პოზიტიურად შეაფასეს და მინისტრს და საკანონმდებლო პაკეტზე მომუშავე გუნდს მადლობა გადაუხადეს. „წარმოდგენილი ცვლილებები რევოლუციურ რეფორმად შეიძლება შეფასდეს, რომელიც ფუნდამენტურად უცვლის ხასიათს ჩვენი სასჯელაღსრულების სისტემას ანუ თუ ადრე ის იყო დასჯაზე და იზოლაციაზე გათვლილი, ეს არის ჰუმანური სისტემა და პრაქტიკამ და მსოფლიო გამოცდილებამ აჩვენა, რომ ასეთი სისტემა უფრო ორიენტირებულია კრიმინალის შემცირებაზე“, - განაცხდა კომიტეტის წევრმა დიმიტრი ცქიტიშვილმა.

საკანონმდებლო ცვლილებების პროექტი კომიტეტის თავმჯდომარემ უმნიშვნელოვანესად შეაფასა და სასჯელარსრულების სისტემის რეფორმის მნიშვნელობას გაუსვა ხაზი.

„ნამდვილად უმნიშვნელოვანესი ცვლილებებია, რომელიც კიდევ უფრო გააჯანსაღებს იმ მაღალ სტანდარტს, რაც პრინციპში უკვე მიღწეულია და ეს მინისტრის და მისი თანამშრომლების დამსახურებაა. ჩვენ იმ სისტემიდან, რომელიც 2012 წლამდე მოქმედებდა, მივაღწიეთ და იმ კონდიციამდე მივედით, რაზეც დღეს კახა კახიშვილი საუბრობს. დღევანდელი ცვლილებები აბსოლიტურად წარმოუდგენელი იყო 4 წლის წინ, შესაბამისად ყველა იმ ადამიანს ვუხდით მადლობას, რომლებმაც მის შემუშავებაში მიიღო მონაწილეობა“ - აღნიშნა სოფო კილაძემ.

დღესვე კომიტეტის სხდომაზე სარატიფიკაციოდ წარმოდგენილი ხელშეკრულებები განიხილეს. ფინანსთა მინისტრის მოადგილე გიორგი კაკაურიძემ კომიტეტის წევრებს ამერიკის შეერთებულ შტატებსა და საქართველოს შორის გაფორმებულ საგრანტო ხელშეკრულებების ცვლილებების ორი პროექტი გააცნო, რომლის მიხედვითაც ამერიკული მხარის მიერ საქართველოსთვის გამოყოფილი ფინანსური დახმარებები იზრდება.

კომიტეტის სხდომაზე განხილულ საკითხებზე პარლამენტის პლენარული სხდომა იმსჯელებს.