პოლიტიკა

პეკინის გამზირის ცალმხრივად დატოვების შესახებ პოლიტიკური გადაწყვეტილება უკვე მიღებულია - დავით ნარმანია

პეკინის გამზირის ცალმხრივად დატოვების შესახებ პოლიტიკური გადაწყვეტილება უკვე მიღებულია.

შესაბამისი განცხადება დედაქალაქის მერმა ტვ ,,პირველის’’ გადაცემაში ,,საქმიან დილა’’ გააკეთა.

მას შემდეგ, რაც თბილისის მერიამ პეკინის ქუჩაზე სრული რეაბილიტაციის პროექტი დაიწყო, გავრცელდა ინფორმაცია, რომ სამომავლოდ აღნიშნული გამზირი ცალმხრივი გახდება. ნარმანიას თქმით, ამ ეტაპისთვის, შესაბამისი გაანგარიშებები და მარშუტების დაზუსტება მიმდინარეობს.

„პოლიტიკური გადაწყვეტილებები ამასთან დაკავშირებით მიღებულია, თუმცა ეს არ იქნება მხოლოდ პოლიტიკურ გადაწყვეტილებაზე დამოკიდებული. თუ პოლიტიკური გადაწყვეტილება და შესაბამისი გაანგარიშებები ერთმანეთს დაემთხვევა და პეკინზე მოძრაობა ცალმხრივად იქნება უფრო ადვილი და უკეთესი, ვიდრე ორმხრივის შემთხვევაში. რა თქმა უნდა, ამ გადაწყვეტილებას მივიღებთ და ვაცნობებთ საზოგადოებას, თუმცა ამ ეტაპზე ეს გადაწყვეტილება განხილვის ქვეშ არის “, - განმარტა დავით ნარმანიამ.

მისივე თქმით, სამუშაო შეხვედრა მერიის წარმომადგენლებს, საპატრულო პოლიციასა და კონტრაქტორებს შორის დღესაც გაიმართება და აღნიშნულ საკითხს განიხილავენ.

შეგახსენებთ, რომ დაგეგმილი სარეაბილიტაციო სამუშაოების გამო, პეკინის ქუჩა ცალმხრივად გადაიკეტა არქივიდან სასტუმრო holiday inn-ის ჩათვლით. სამუშაოები 24-საათიან რეჟიმში მიმდინარეობს და სავარაუდოდ, 10 სექტემბრამდე დასრულდება.

ნინო ექვთიმიშვილი