პოლიტიკა

,,პატრიოტთა ალიანსმა’’ შესაძლოა ადგილობრივი თვითმმართველობის არჩევნებს ბოიკოტი გამოუცხადოს

პარლამენტის ფრაქცია ”საქართველოს პატრიოტების” წევრებმა შეხვედრა გამართეს ევროსაბჭოს საპარლამენტო ასამბლეის მონიტორინგის კომიტეტის წევრებთან, სადაც საუბარი შეეხო ქვეყანაში საარჩევნო გარემოს შეცვლის საკითხს.

როგორც პარლამენტის ვიცე-სპიკერმა ირმა ინაშვილმა ჟურნალისტებს შეხვედრის შემდეგ განუცხადა, გამორიცხული არ არის ,,პატრიოტთა ალიანსმა’’ ადგილობრივი თვითმმართველობის არჩევნებს ბოიკოტი გამოუცხადოს.

”ხაზი გავუსვით იმას, რომ ადგილობრივი თვითმმართველობის არჩევნები უნდა ჩატარდეს სულ სხვა გარემოში. ის კანონმდებლობა, ის სისტემა, რაც დღეს ფუნქციონირებს, სულაც არ არის თავისუფალი, დემოკრატიული და სამართლიანი. ვისაუბრეთ იმაზე, რომ უნდა გაუქმდეს მაჟორიტარული საარჩევნო სისტემა, რაც არის უმნიშვნელოვანესი საკითხი.

მონიტორინგის კომიტეტის წევრები დაინტერესდნენ საკონსტიტუციო კომისიის საქმიანობით და იმით, ვუჭერთ მხარს, პრეზიდენტის საყოველთაო არჩევის წესს თუ პრეზიდენტის არჩევას პარლამენტის მიერ.

ჩვენ ვთქვით, რომ მხარს ვუჭერთ პრეზიდენტის პირდაპირი წესით არჩევას. საარჩევნო თემატიკაზე მონიტორინგის ჯგუფის წევრებს დეტალური ინფორმაცია მივაწოდეთ, რადგან მოახლოებულია ადგილობრივი თვითმმართველობის არჩევნები და ხელისუფლება ამბობს, რომ არაფერს შეცვლის. ჩვენ არ გამოვრიცხავთ, დღის წესრიგში არჩევნების ბოიკოტის საკითხის დაყენებას”, - განუცხადა ჟურნალისტებს ირმა ინაშვილმა.

ნინო ექვთიმიშვილი