პოლიტიკა

„პატრიოტთა ალიანსის“ წევრები და რუსი პარლამენტარები საერთაშორისო კონფერენციის გამართვას აპირებენ - ის შეიძლება საქართველოში ჩატარდეს

„პატრიოტთა ალიანსის“ წევრები და რუსი პარლამენტარები გამოვიდნენ ინიციატივით, რომ ქართულ-რუსულ ურთიერთობათა პრობლემების განსახილველად საერთაშორისო კონფერენცია გაიმართოს. ინფორმაციას რუსული გამოცემა REGNUM ავრცელებს.

რუსეთის კომუნისტური პარტიის წევრის, ლეონიდ კალაშნიკოვის განცხადებით, იდეა „პატრიოტთა ალიანსს“ ეკუთვნის.

„ქართველმა კოლეგებმა შემოგვთავაზეს საერთაშორისო კონფერენციის გამართვა, რომელიც შეძლებს, ამ პრობლემებისადმი (უპირველეს ყოვლისა, ჰუმანიტარულის) აგრეთვე სხვა ქვეყნებისა და საერთაშორისო ორგანიზაციების ყურადღების მიქცევას. ჩვენ ამ ინიციატივას დავეთანხმეთ. სავარაუდოდ, ასეთი კონფერენცია ჩატარდება“, -აღნიშნა რუსმა დეპუტატმა.

გარდა ამისა, კონფერენციაზე აპირებენ იმსჯელონ რუსეთ-საქართველოს ურთიერთობებზე თბილისი-ნატოს თანამშრომლობის კონტექსტში.

ქართველი პარლამენტარის, გიორგი ლომიას განცხადებით, უმჯობესია, ფორუმი რაც შეიძლება მალე ჩატარდეს საქართველოში, რადგან ამას ნატო-საქართველო-რუსეთის თემა ითხოვს.

„აქ არაა აუცილელეებლი ულტიმატუმის წაყენება - ან ეს, ან ის. შესაძლებელია ნატოსთან თანამშრომლობა, რუსეთთანაც ისე, რომ რუსეთმა საფრთხე არ იგრძნოს. ეს ის საკითხებია, სადაც აუცილებელია შეთანხმება. ამიტომ ძალიან კარგი იქნება, თუკი ეს ფორუმი საქართველოში ჩატარდება და რაც შეიძლება მალე“, -აღნიშნა „პატრიოტთა ალიანსის“ წევრმა.

„პატრიოტთა ალიანსის“ წევრები: ადა მარშანია, ნატო ჩხეიძე და გიორგი ლომია მოსკოვში გუშინ გაიმგზავრნენ. წელს ეს „პატრიოტების“ მეორე ვიზიტია რუსეთში. „ალიანსის“ წევრები რუსეთის დუმის დეპუტატებს 11 ივლისს შეხვდნენ.