პოლიტიკა

,,პატრიოტთა ალიანსი“ საპროტესტო აქციებს იწყებს

"პატრიოტთა ალიანსი" საპროტესტო აქციების ციკლს იწყებს.

როგორც პარტიის ერთ-ერთმა ლიდერმა ირმა ინაშვილმა დღევანდელ ბრიფინგზე განაცხადა, პირველი აქცია 17 სექტემბერს გაიმართება.

,,მინდა გითხრათ, რომ ეს აქცია არ დასრულდება საპროტესტო მსვლელობით და შიმშილობის აქტით. უკვე მზად არის 17 მოშიმშილე, რომელიც 17 სექტემბრიდან დაიწყებს შიმშილობას, გაგრძელდება აქცია 1 ოქტომბერს ისევ რესპუბლიკის მოედანზე შევიკრიბებით, 24 სექტემბერს ბათუმში იქნება, რვა ოქტომბერს უკვე შევიკრიბებით თავისუფლების მოედანზე, მთელი ამ პერიოდის მანძილზე მოშიმშილეთა რაოდენობა გაიზრდება",- განაცხადა ირმა ინაშვილმა.

ინაშვილმა ჟურნალისტებს მოთხოვნები გააცნო.

მისი თქმით, კონსტიტუციის ნაწილში ,,პატრიოტთა ალიანსის“ მოთხოვნები იქნება:

1. საქართველოს კონსტიტუციაში მკაფიოდ ჩაიწეროს, რომ ტერიტორიული მთლიანობის აღდგენა სახელმწიფოს უპირველესი ამოცანაა.

2. კონსტიტუციაში ჩაიწეროს, რომ ახალგაზრდა თაობაში ეროვნული ცნობიერებისა და ქართული აზროვნების ჩამოყალიბება სახელმწიფოს უპირველესი ვალდებულებაა.

3. უნდა აღდგეს ჩანაწერი,რომლის თანახმადაც კულტურული მემკვიდრეობის დაცვა თითოეული მოქალაქის ვალდებულებაა.

4. სასოფლო-სამეურნეო დანიშნულების მიწის არც მფლობელი და არც დამქირავებელი არ შეიძლება იყოს უცხოელი.

5. მაჟორიტარული საარჩევნო სისტემა უნდა გაუქმდეს.

რაც შეეხება პოლიტიკურ ნაწილს, აქ პარტია შემდეგ მოთხოვნებზე აკეთებს აქცენტს:

1. შეიქმნას სახელმწიფო კომისია რომელიც დაიწყებს მუშაობას ახალი პოლიტიკური ფორმატის "საქართველო-ნატო-რუსეთის"ამოქმედებაზე რომელიც უპრეცედენტო პროექტია თავდაუსხმელობის, უსაფრთხოების, საზღვრების უცველობის კუთხით და ამავე კონტექსტში დაიწყოს პირდაპირი დიალოგი სოხუმთან, ცხინვალთან და მოსკოვთან.

,,სოციალური პოლიტიკის ნაწილში ჩვენი მოთხოვნები ასეთია:

1.შეიქმნას საბანკო გადასახადების მარეგულირებელი კომისია,რომელიც დაარეგულირებს არა უბრალოდ საბანკო კრედიტის პროცენტის მოცულობას,არამედ ჯამში ყველა საბანკო გადასახადს. წლიურად,ეს გადასახადი დოლარში უნდა იყოს 6%, ხოლო ლარში 9%,იგივე უნდა ეხებოდეს მიკრო საფინანსო ორგანიზაციებს. ეროვნულმა ბანკმა სასწრაფოდ უნდა დაიწყოს საბანკო გადასახადების რეგულაცია და პროცენტის შემცირება იმგვარად რომ მოსახლეობამ თავი დააღწიოს საბანკო ტერორს და მძევლობას.

2. იპოთეკარებისა და მეანაბრეების თემა - სასწრაფოდ შეიქმნას სახელმწიფო კომისია,რომელიც ინდივიდუალურად განიხილავს თითოეული დაზარალებულის საქმეს და არა მარტო განიხილავს,არამედ ინდივიდუალურად გადაწყვეტს ყოველი კონკრეტული ოჯახის საკითხს,სწორედაც რომ ბიუჯეტიდან გამოყოფილი სახსრებით.

3. დაიწყოს ხელახალი აღწერა და სოციალური შემწეობა აღუდგეს ყველა იმ მოქალაქეს,რომელსაც ის უსამართლოდ გაუუქმეს,შეიცვალოს ე.წ. კრიტერიუმების, ქულების მინიწების აბსურდული სისტემა,რომლის საფუძველზეც შემწეობა ერთმევა ყველა გაღატაკებულ ფენას",- განაცხადა ირმა ინაშვილმა.