პოლიტიკა

პატრიარქმა გამარჯვება მომილოცა და საპატრიარქოში მოსვლა მთხოვა, ეს იყო ჩემთვის პირველი ნიშანი, რომ გავხდი საქართველოს პრეზიდენტი - სალომე ზურაბიშვილი

საქართველოს ახლად არჩეული პრეზიდენტის, სალომე ზურაბიშვილის განცხადებით, სრულიად საქართველოს კათოლიკოს-პატრირქმა, ილია მეორემ მას დილით არჩევნებში გამარჯვება მიულოცა და საპატრიარქოში მისვლა სთხოვა.

„პირველად ამ დილით პატრიარქმა მომილოცა გამარჯვება. მთხოვა, რომ მოვსულიყავი საპატრიარქოში, სადაც სინოდიც იყო შეკრებილი, ეს იყო ჩემთვის ნამდვილი პირველი ნიშანი, რომ გავხდი საქართველოს პრეზიდენტი.

დღეს ვიგრძენი თავი საქართველოს პრეზიდენტად. ეს იყო ჩემთვის ძალიან მნიშვნელოვანი შეხვედრა საქართველოს პატრიარქთან. ჩვენი ხედვა ზუსტად ემთხვევა ერთმანეთს. ჩვენ გვჭირდება ამ ქვეყნის დამშვიდება, საზოგადოების დამშვიდება, ახალი პოლიტიკური ურთიერთობების დამყარება, რომელიც არ იქნება დაფუძნებული არც გადატრიალებაზე, არც მოწოდებაზე ძალადობისკენ, არამედ დამშვიდებისკენ.

ეს არის ევროპული საზოგადოება, საქართველომ აირჩია ევროპა, საიდანაც მე მოვდივარ, აირჩია ევროპული მომავალი. ეს არის ჩემი მთავარი გეგმა, როგორ დავამშვიდოთ საზოგადოება და როგორ გადავიყვანოთ ახალ ყაიდაზე“, – განაცხადა სალომე ზურაბიშვილმა პატრიარქთან შეხვედრის შემდეგ.