პოლიტიკა

პარტიულ შეხვედრაზე განვიხილეთ, რომ 2018 წელს პრეზიდენტი არაპირდაპირი წესით უნდა იყოს არჩეული - მამუკა მდინარაძე

ფრაქცია „ქართული ოცნების“ თავმჯდომარის, მამუკა მდინარაძის განცხადებით, შატო მუხრანში გამართულ პარტიულ შეკრებაზე განიხილეს 2018 წელს საპრეზიდენტო არჩევნების არაპირდაპირი წესით ჩატარების ვარიანტი.

„შემიძლია დაგიდასტუროთ, რომ უმრავლესობის შეხვედრაზე ბევრი აზრი იყო დაფიქსირებული, იმასთან დაკავშირებით, რომ პრეზიდენტი 2018 წელს არაპირდაპირი წესით უნდა იქნას არჩეული. კონკრეტულ პირებზე საუბარს აზრი არ აქვს, რადგან ეს აზრი სხვადასხვა ადამიანმა დააფიქსირა. ამის არგუმენტი იყო ის, რომ როცა კომპრომისს აზრი ეკარგება, მაშინ შესაძლებელია, იმ სისტემაზე პირდაპირ გადავიდეთ, რაც კლასიკური გაგებით, საპარლამენტო მოდელისთვის სწორია. უმრავლესობაში საკითხი განხილვის საგანი კიდევ ერთხელ იქნება", - განუცხადა მდინარაძემ ჟურნალისტებს.

საპარლამენტო უმრავლესობის წევრის თქმით, ცვლილება არაა მიმართული კონკრეტული პერსონისაკენ.

შეგახსენებთ, ახალი საკონსტიტუციო პროექტის თანახმად, პრეზიდენტს არაპირდაპირი წესით აირჩევენ. ქვეყნის პირველ პირს 300 ხმოსანი აირჩევს.

„შატო მუხრანში“ „ქართული ოცნების“ პარტიული შეხვედრა 4 ივნისს გაიმართა. შეკრებაზე იმსჯელეს „ქართული ოცნების“ თბილისის მერობის კანდიდატზე, საკონსტიტუციო ცვლილებებსა და თვითმმართველობის რეფორმებზე, ასევე მაჟორიტარული სისტემის გაუქმებასა და ადგილობრივი თვითმმართველობის არჩევნების წინასაარჩევნო პროგრამაზე.

ანა მებურიშვილი