საზოგადოება

პარლამენტთან უწყვეტი პროტესტის მონაწილე სამი ახალგაზრდა დააკავეს

შინაგან საქმეთა სამინისტროს თანამშრომლებმა უწყვეტი პროტესტის მონაწილე სტუდენტების დაკავება დაიწყო. პოლიციამ ხელბორკილები სამ ახალგაზრდას, მათ შორის, საქართველოს ეროვნული უნივერსიტეტის სტუდენტებს დაადო, - ამის შესახებ ტვ პირველი იტყობინება.

რუსთაველის გამზირზე დაპატიმრებულთა შორის არიან თაკო გვილია და თათია აფრიამაშვილი. მათთან ერთად ასევე დააკავეს ახალგაზრდა კაცი, რომელიც პოლიციელებს დაპატიმრებულთა შესახებ კითხვებს უსვამდა.

დაკავებების სერია მას შემდეგ დაიწყო, რაც ძლიერ წვიმაში მყოფი ახალგაზრდებისთვის მოქალაქეებმა პლასტიკის სკამები მიიტანეს. ვახო გომელაურის უწყების წარმომადგენლებმა სტუდენტებს სკამები წაართვეს, შემდეგ კი ძალის გამოყენებით დაკავების მანქანაში ჩატენეს. ახალგაზრდებთან ერთად "დაპატიმრებულია" სკამებიც.

მთავარი მიზეზი იყო სკამებიც. მოგეხსენებათ, რომ 24 საათის განმავლობაში ვაპროტესტებთ და ახლა წვიმს. ჩვენთან არიან ხანდაზმული ადამიანები, პატიმრების მშობლები, რომლებიც ფეხზე ვერ დადგებიან. ამიტომ, გვინდოდა მოგვეტანა სკამები, რომ დამსხდარიყვნენ ისინი. ეს რომ ნახა პოლიციამ, მათ გვითხრეს, ორი წამით უნდა დაგველოდოთო. გადარეკეს სადღაც და შემდეგ გვითხრეს, რომ სკამებს ზემოთ ვერ აგატანინებთ, რადგან სკამები საფრთხისშემცველი არისო.

რომ ვიკითხეთ, რა შეიძლება პლასტმასის პატარა სკამს გამოეწვია, პასუხი ვერ გაგვცეს. თათია და თაკო დასხდნენ სკამებზე და ზუსტად ამიტომ პოლიციამ მოკიდა ხელი და წაათრიეს, ჩატენეს მანქანაში. მესამე დაკავებულის გვარი არ მახსოვს, მაგრამ მხოლოდ იმიტომ ჩატენეს მანქანაში, რომ იკითხა, 20 წლის ბავშვები რატომ შეტენეთ ასე უმოწყალოდო. ხალხნო, რანაირ ქვეყანაში ვცხოვრობთ. სკამის გამო რომ დაგაპატიმრებენ, ეს ქვეყანაა?. - განაცხადა თვითმხილველმა.

ფოტო: ტვ პირველი