პოლიტიკა

პარლამენტში თამბაქოს კონტროლის კანონმდებლობის რეფორმირებაზე მსჯელობენ

დახურულ შენობებში, საზოგადოებრივ ტრანსპორტსა და სტადიონებზე, შესაძლოა, მოწევა აიკრძალოს. კანონმდებლობა მკაცრდება ახალი კანონპროექტით „თამბაქოს კონტროლის შესახებ“ საქართველოს კანონში ცვლილების შეტანის თაობაზე“, რომელზეც ჯანმრთელობის დაცვისა და სოციალურ საკითხთა კომიტეტის სხდომაზე მსჯელობენ.

სხდომაზე დამსწრეთ, საშუალება აქვთ, კომიტეტის მიერ ორგანიზებული გამოფენაც დაათვალიერონ.

„გამოფენა კიდევ ერთხელ გვახსენებს, რამდენად მნიშვნელოვან საკითხზე ვართ შეკრებილები და რაოდენ მნიშვნელოვანია ის გადაწყვეტილება, რომელსაც, დიდი იმედია, მივიღებთ. ასევე, იმედი მაქვს, რომ უახლოეს მომავალში პარლამენტი მხარს დაუჭერს თამბაქოს კონტროლის კანონმდებლობის სრულყოფას და მის საერთაშორისო პრაქტიკასთან შესაბამისობაში მოყვანას“,- განაცხადა ჯანმრთელობის დაცვისა და სოციალურ საკითხთა კომიტეტის თავმჯდომარემ, აკაკი ზოიძემ.

თამბაქოს კონტროლის კანონმდებლობის რეფორმირების პროცესში, ჯანმრთელობის მსოფლიო ორგანიზაციის სახელით, მხარდაჭერა დაადასტურა ორგანიზაციის საქართველოს ოფისის ხელმძღვანელმა, მარიან ივანუშამ.

საკანონმდებლო ცვლილებების მომზადების წინაისტორიაზე ისაუბრა კანონპროექტის ავტორმა, პარლამენტის წვერმა გუგული მაღრაძემ. მისი განცხადებით, საკანონმდებლო ცვლილებები ჯერ კიდევ მერვე მოწვევის პარლამენტში მომზადდა და მისი ინიცირებაც მოხდა.

„მიხარია, რომ მეცხრე მოწვევის პარლამენტი დაფიქსირდება ისტორიაში, როგორც პარლამენტი, რომელიც მიიღებს ამ ძალიან მნიშვნელოვან შესწორებებს კანონში“,- განაცხადა დეპუტატმა.

კანონპროექტის წარდგენამდე, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა, ამირან გამყრელიძემ „თამბაქოს კონტროლის საერთაშორისო პრაქტიკასა და ადგილობრივ გამოწვევებზე“ ისაუბრა.