პოლიტიკა

პარლამენტში ფილტრიან და უფილტრო სიგარეტზე აქციზის დიფერენცირებული განაკვეთების გათანაბრებაზე საკანონმდებლო ინიციატივას მეორე მოსმენით მხარი დაუჭირეს

დღეს პარლამენტის საფინანსო-საბიუჯეტო კომიტეტის სხდომაზე „საქართველოს საგადასახადო კოდექსში ცვლილების შეტანის შესახებ“ კანონპროექტს მეორე მოსმენით მხარი დაუჭირეს.

აღნიშნული კანონპროექტის მიზანს ქვეყანაში თამბაქოს მოხმარების შემცირებისა და საბიუჯეტო შემოსავლების ზრდის მიზნით ფილტრიანი და უფილტრო სიგარეტებისათვის გათვალისწინებული აქციზის დიფერენცირებული განაკვეთის გათანაბრება წარმოადგენს. აღიშნული საკანონმდებლო ინიციატივა ეკუთვნის პარლამენტის წევრებს: აკაკი ზოიძეს, დიმიტრი ხუნდაძეს, ლევან კობერიძეს, ილია ნაკაშიძესა და დიმიტრი მხეიძეს.

აკაკი ზოიძის განცხადებით, საგადასახადო კოდექსის პროექტში ასევე აისახა პარლამენტის წევრის, პაატა კვიჟინაძის ინიციატივაც, რომელიც პლენარულ სხდომაზე გამოითქვა. მომხსენებელმა ამ ინიციატივების შესახებ კოლეგებს ინფორმაცია გააცნო.

„ესაა ინიციატივა, რომლებიც ადამიანებს სიცოცხლეს უმარტივებს - ესაა ჯარიმების ლიბერალიზაცია საგადასახადო კუთხით. სავალუტო ფონდის შემოთავაზებაც იყო, რომ ჯარიმები არ არის პროპორციული დარღვევების და საჭიროა მათი შესაბამისობაში მოყვანა. ამით ჩვენ ვუმსუბუქებთ ადამიანებს მდგომარეობას. მეორე - ის, რასაც თავიდან ოპოზიციამაც და პოზიციამაც დაუჭირა მხარი, მენაშენეებს ეხება. საქმე ეხება დაუმთავრებელ მშენებლობებს, რომლებიც 2008 წლამდე დაიწყო, რომ როგორმე დამთავრდეს და მიეცეს მათ საგადასახადო შეღავათები. ამ შეღავათებს ვადა გასდის და სასწრაფოდ უნდა გადაიწიოს 2022 წლამდე. მესამე თემა მიკროსაფინანსო ბანკებს ეხება, რომ შეღავათი გავრცელდეს და უიმედო ვალების ჩამოწერის შედეგად ფიზიკურმა პირებმა აღარ გადაიხადონ საშემოსავლო. ეს ადამიანების ყოფის შემამსუბუქებელი ინიციატივებიც აისახა წარმოდგენილ კანონპროექტში“,- განაცხადა ზოიძემ.

კომიტეტის თავმჯდომარის, ირაკლი კოვზანაძის განცხადებით, წარმოდგენილ ვარიანტზე მთავრობის თანხმობაც არის, რის შემდეგაც კანონპროექტს კენჭი უყარეს და მხარი დაუჭირეს.