პოლიტიკა

პარლამენტში ე.წ „გირგვლიანის შესწორებებს“ განიხილავენ

პარლამენტში სისხლის სამართლის კოდექსში შესატან ე.წ „გირგვლიანის შესწორებებზე“ პირველი მოსმენით მსჯელობენ.

სხდომას ოპოზიცია არ ესწრება, რადგან ის ამ საკანონმდებლო ცვლილებებს მხარს არ უჭერს.

აღნიშნული საკანონმდებლო ცვლილებები ითვალისწინებს პოლიტიკური თანამდებობის პირების მიერ განხორციელებული უკანონო ქმედებებისთვის სასჯელის გამკაცრებას. უმრავლესობის განმარტებით, მაგალითად, მოქმედი კანონმდებლობით უფლებამოსილების გადამეტებისთვის გათვალისწინებულია თავისუფლების აღკვეთის ვადა გაიზრდება.

იურიდიულ საკითხთა საპარლამენტო კომიტეტის თავმჯდომარის, ეკა ბესელიას თქმით, ეს ინიციატივა თანამდებობის პირებისთვის გზავნილი უნდა იყოს.

„ნებისმიერი სახელმწიფო პოლიტიკური თანამდებობის პირი, რომელიც ჩაიდენს ნებისმიერ იმ დანაშაულს, რომელიც დღეს არის სისხლის სამართლის კოდექსით მძიმე მუხლებში გამოტანილი, ასეთია, მკვლელობა, წამება, გაუპატიურება, ძალადობრივი ქმედებები და ა.შ. დაისჯება უფრო მკაცრად, ვიდრე დაისჯება ჩვეულებრივი მოქალაქე. ეს არის მთავარი გზავნილი“, -აღნიშნა ბესელიამ.

უმრავლესობის წევრის, გედევან ფოფხაძის თქმით, „არავის არ უნდა ჰქონდეს იმის განცდა, რომ დღეს თუ ის ხელისუფლებაშია, მას შეუძლია განუკითხავად, ადამიანის უფლებების იგნორირებით, ხალხის ინტერესის გაუთვალისწინებლად იყენებდეს კანონს და ჰქონდეს იმის განცდა, რომ ის დაუსჯელი დარჩება მომავალში“.

ამ საკანონმდებლო ინიციატივით პასუხისმგებლობა მკაცრდება იმ პირების მიმართაც, ვინც მაღალი თანამდებობის პირის მიერ გაცემულ დანაშაულებრივ ბრძანებას ან დავალებას შეასრულებენ.