პოლიტიკა

პარლამენტს უნდა ჰქონდეს კვოტირების ისეთი სისტემა, რომ მყარად გამორიცხავდეს ხალხისთვის მიუღებელი კანდიდატურების არჩევას - ირმა ინაშვილი

პარლამენტის ვიცე-სპიკერის, ირმა ინაშვილის განაცხადებით, პარლამენტს უნდა ჰქონდეს კვოტირების ისეთი სისტემა, რომ მყარად გამორიცხავდეს საზოგადოების, ხალხისთვის მიუღებელი კანდიდატურების არჩევა- დანიშვნას ამა თუ იმ თანამდებობაზე.

,,პარლამენტს უნდა ჰქონდეს კვოტირების ისეთი სისტემა, იმგვარი რეგლამენტი, რომ მყარად გამორიცხავდეს საზოგადოების, ხალხისთვის მიუღებელი კანდიდატურების არჩევა- დანიშვნას ამა თუ იმ პოსტზე. კაკაბაძის შემთხვევაში, ლომჯარიას შემთხვევაში გამოვიდა, რომ კვოტირების სისტემას, რეალურად კი, კობახიძე- მდინარაძეების გაუგებარ ლოგიკას შეეწირა სახალხო დამცველის პოსტი და ახლა უკვე საზოგადოებრივი მაუწყებლის ბორდის წევრის თანამდებობა. ეს რეგლამენტი, ეს სისტემა არ იცვლება იმიტომ, რომ საპარლამენტო ხელისუფლების უზურპაციის საუკეთესო საშუალებაა და საპარლამენტო თამაშების, გარიგებების საუკეთესო საშუალებაა. ვგულისხმობ, კობახიძე-მდინარაძეების ჯგუფის გარიგებას ბოკერიასთან, რომლის ფრაქციის კანდიდატურა იყო კაკაბაძე. სამწუხაროდ, ჩვენს ფრაქციას არ ჰქონდა ეს კვოტა,- წარგვედგინა კანდიდატურა საზოგადოებრივი მაუწყებლის ბორდში. იმაზე არავინ საუბრობს, რომ სასწრაფოდ შეიცვალოს მანკიერი სისტემა და გახდეს ის სამართლიანი და თავისუფალი, ყველა საპარლამენტო ფრაქციისთვის ხელმისაწვდომი... იმაში გვარწმუნებენ, რომ თუ ოპოზიცია ნეგატიურ კადრს წარადგენს, ეს მმართველი გუნდისთვის კარგია. სახელმწიფოსთვის, ხალხისთვის რა არის კარგი, ეს არავის აინტერესებს. მეგის ქარდავა რომ წარადგინოს ბოკერიამ სახალხო დამცველის პოსტზე, მდინარაძე რას გვეტყვის, კვოტირების სისტემა ასეთი გვაქვს და მეგის ქარდავა ან კოხტა კოდუა უნდა ავირჩიოთო, თუ როგორაა საქმე?!“ - წერს ინაშვილი ფეისბუქის პირად გვერდზე.