სამართალი

პარლამენტის საგამოძიებო კომისიის რეკომენდაციის თანახმად, მიხეილ კალანდია სისხლის სამართლებრივ დევნას უნდა დაექვემდებაროს - ოთარ კახიძე

მიხეილ კალანდია პარლამენტის საგამოძიებო კომისიის რეკომენდაციის თანახმად და ჩვენი შეფასებით, სისხლის სამართლებრივ დევნას უნდა დაექვემდებაროს, მის წინააღმდეგ არსებული მტკიცებულებების სპექტრის გათვალისწინებით, – განუცხადა ჟურნალისტებს ხორავას ქუჩაზე მომხდარი მკვლელობის შემსწავლელი პარლამენტის საგამოძიებო კომისიის ერთ–ერთმა წევრმა ოთარ კახიძემ.

სპეციალიზებულ ცენტრში ფსიქოლოგების მიერ მიხეილ კალანდიას გამოკითხვა მიმდინარეობს.

გამოკითხვას ასევე ესწრებიან აღნიშნული საგამოძიებო კომისიის თავმჯდომარე და სხვა წევრები. კომისიამ უკვე დაკითხა მოწმე ა.ს., რომელმაც შენობა მედიასთან გამოჩენის გარეშე დატოვა.

დღესვე მოხდება ორი არასრულწლოვნის გამოკითხვა, რომელთა ვინაობაც არ სახელდება.

ოთარ კახიძის თქმით, არსებობს 8 მოწმის მტკიცებულება და საკუთრივ მ.კ.–ს აღიარებითი ჩვენება, რომ იგი არის მკვლელობაში თანამონაწილე.

ამასთან, როგორც საგამოძიებო კომისიის წევრი ამბობს, ირკვევა, რომ საქმის პროკურორები არ ატარებენ შესაბამის ღონისძიებებს, რაც მ.კ.–ს მხილებისთვის არის საჭირო.

„არ არის ვალდებული ადამიანმა მისცეს ჩვენება საკუთარი თავის წინააღმდეგ, განსაკუთრებული მოლოდინი მ.კ.–ს ჩვენების ინფორმატიულობასთან დაკავშირებით არ გვაქვს. თუმცა ჩვენ, რა თქმა უნდა, გვაქვს კითხვები, რადგან მ.კ. არის ის პირი, რომლის უშუალო ჩართულობითაც დაიწყო საერთოდ ეს კონფლიქტი. ეს არის პირი, რომელმაც შეკრიბა თავისი სამეგობრო, რომლებიც შემდგომ სხვადასხვა დანაშაულში არიან მხილებულები და ეს არის პირი, რომელიც ჩხუბის დაწყებიდან ბოლომდე სარალიძესთან იმყოფებოდა ფარდულში და მასთან უშუალო ფიზიკური კონტაქტი ჰქონდა, იჭერდა და ურტყამდა მას. ამავე დროს ხედავდა როგორ ურტყამდნენ დავით სარალიძეს დანებს. ამიტომ ეს პირი ძალიან მნიშვნელოვანი, ცენტრალური ფიგურაა ამ საქმის, თუმცა, კიდევ ერთხელ ხაზი მინდა გავუსვა, რომ პირი არ არის ვალდებული მისცეს ჩვენება საკუთარი თავის წინააღმდეგ“, – განაცხადა ოთარ კახიძემ.

რაც შეეხება ა.ს.–ს გამოკითხვას, ოთარ კახიძემ დაკითხვის შინაარსზე საუბრისაგან თავი შეიკავა.

ნინო ექვთიმიშვილი