პოლიტიკა

პარლამენტის ქუთაისიდან თბილისში გადმოტანას არ ვემხრობი - კობა ნარჩემაშვილი

პარლამენტის წევრისა და ქუთაისის მაჟორიტარი დეპუტატის კობა ნარჩემაშვილის განცხადებით, ის მხარს არ დაუჭერს პარლამენტის ქუთაისიდან თბილისში გადატანის საკითხს.

ნარჩემაშვილი გამოეხმაურა ადა მარშანიას 21 იანვარს გაკეთებულ კომენტარს, რომ საკონსტიტუციო კომისია შეთანხმდა პარლამენტის თბილისში დაბრუნებაზე. ქუთაისის მაჟორიტარის თქმით, კომისიას პარლამენტის ადგილმდებარეობის შეცვლის შესახებ არ უმსჯელია.

“მსჯელობა არ ყოფილა. მე პირადად ამ გადაწყვეტილებასთან დაკავშირებით მაქვს იგივე პოზიცია, რაც ადრე მქონდა, – არ ვუჭერ მხარს პარლამენტის ქუთაისიდან თბილისში გადმოტანას. კონსტიტუციის ფარგლებში ამ საკითხზეც იქნება მსჯელობა”, – განაცხადა კობა ნარჩემაშვილმა ჟურნალისტებთან საუბრისას.

ნარჩემაშვილი ასევე არ ეთანხმება კომისიის წევრთა ნაწილის ინიციატივას, რომ კონსტიტუციაში იყოს მითითებული ქვეყნის ევროატლანტიკური კურსისკენ მისწრაფება.

“ვფიქრობ, რომ კონსტიტუციაში ასეთი ჩანაწერი, – ეს არის პირადად ჩემი აზრი, – არ უნდა არსებობდეს, იმიტომ, რომ თავისთავად ის ღირებულებები, რაც ასახულია კონსტიტუციაში, ეს არის აზრის, სიტყვის, გამოხატვის თავისუფლება, შრომის უფლება, ეკონომიკური თავისუფლება, საქმიანობის განხორციელების უფლება, – ესენი სხვა არაფერია, თუ არა ევროპული ღირებულებები. ამდენად, შესაძლებელია, რომ მოკლევადიან პერსპექტივაში ეს დაფიქსირდეს გარდამავალ დებულებებში, ხოლო თვითონ კონსტიტუციის ძირითად კონსტრუქციაში ამ ჩანაწერის არსებობას მხარს არ ვუჭერ”, – ამბობს კობა ნარჩემაშვილი.

შეგახსენებთ, რომ 26 იანვარს თბილისის პარლამენტის სასახლეში საკონსტიტუციო კომისიის ადამიანთა უფლებატა სამუშაო ჯგუფის II სხდომა მიმდინარეობს. შეხვედრაზე ადამიანის ძირითადი უფლებებისა და თავისუფლებების, სასამართლო ხელისუფლების, საქართველოს კონსტიტუციის პრეამბულისა და ზოგადი და გარდამავალი დებულებების საკითხებს განიხილავენ

ანა მებურიშვილი