პოლიტიკა

პარლამენტი არ უნდა იქცეს შეურაცხყოფის მიყენების აპარეზად- სოფო კილაძე

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, სოფო კილაძე პარლამენტის თავმჯდომარის მედიაორგანიზაციებთან შეხვედრაზე მომხდარ ინციდენტსა და ნინო ჯანგირაშვილის განცხადებას ეხმაურება.

,,ასეთი დესტრუქციული ქმედება არის დაუშვებელი და შეურაცხმყოფელი. იმ ფონზე, როდესაც პარლამენტის თავმჯდომარე ახორციელებს თავის უფლებამოსილებას, მსგავსი ქმედება არის ყოვლად გაუმართლებელი და პარლამენტის ინსტიტუციის უპატივცემულობის პირდაპირი დემონსტრირება. პარლამენტი არის ადგილი, სადაც ადამიანებს შეუძლიათ გამოთქვან თავიანთი აზრი, მათ შორის კრიტიკული, თუმცა არავითარ შემთხვევაში ეს არ უნდა იქცეს შეურაცხყოფის მიყენების ასპარეზად. ძალიან სამწუხაროა, როცა ამას ყველა ჟურნალისტი სათანადოდ ვერ აფასებს და ითვალისწინებს", - განაცხადა სოფო კილაძემ.

ტელეკომპანია „კავკასიის“ გენერალურმა დირექტორმა ნინო ჯანგირაშვილმა და „რუსთავი 2“- ის წარმომადგენელმა თამთა მურადაშვილმა პარლამენტის თავმჯდომარესთან მედიაორგანიზაციების შეხვედრა პროტესტის ნიშნად დატოვეს.

შეხვედრაზე ნინო ჯანგირაშვილმა და ირაკლი კობახიძემ იკამათეს. ჯანგირაშვილმა აღნიშნა, რომ 2014 წლის შემდეგ სარეკლამო ბაზარი რადიკალურად არის შემცირებული და ეს კომუნიკაციის მარეგულირებელი კომისიის ოფიციალური მონაცემებით დასტურდება.

„მაუწყებლობის შესახებ კანონზე“ პარლამენტის თავმჯდომარე მედიის წარმომადგენლებს დღეს ხვდება.

ცირა გურგენიძე