პოლიტიკა

ოთხოზორია-ტატუნაშვილის სიაში გარდაცვლილი ადამიანებია შეყვანილი - სერგი კაპანაძე ხელისუფლება უპასუხისმგებლობაში დაადანაშაულა

პარლამენტის ვიცე-სპიკერის, სერგი კაპანაძის განცხადებით, საქართველოს მთავრობის მიერ წარდგენილ ე.წ. ოთხოზორია-ტატუნაშვილის სიაში რუსეთის არცერთი მოქალაქე არაა შეყვანილი, თუმცა იქ მოხვდნენ გარდაცვლილი ადამიანები.

კაპანაძემ აღნიშნა, რომ „ევროპული საქართველო“ მოუწოდებს ხელისუფლებას, მეტი პასუხისმგებლობით მოეკიდოს სიის შედგენას და შეიყვანოს იქ რუსეთის მოქალაქეები.

„სამწუხაროდ, „ოთხოზორია-ტატუნაშვილის სიაში“ არ არის შეყვანილი რუსეთის ფედერაციის არცერთი მოქალაქე. კერძოდ, არ არიან შეყვანილი „ეფ-ეს-ბეს“ ადგილზე არსებული „გერეუსა“ და ზოგადად, საოკუპაციო ძალების წარმომადგენლები, რომლებიც პირდაპირ ახორციელებენ ეფექტურ კონტროლს და ხშირ შემთხვევაში არიან პასუხისმგებელნი არა მარტო დანაშაულის ჩადენაზე, არამედ დამნაშავეებისთვის ხელის დაფარებაზე. არცერთი ასეთი ადამიანი „ოთხოზორია-ტატუნაშვილის სიაში“ არ მოხვდა! ჩვენ, „ევროპული საქართველო“ გავაგრძელებთ მუშაობას იმ კუთხით, რომ ერთი მხრივ, რუსეთის ფედერაციის მოქალაქეებიც მოხვდნენ ამ სიაში, მეორე მხრივ, ამ სიამ მოიპოვოს მხარდაჭერა ჩვენს პარტნიორებში. ჩვენი კონკრეტული ძალისხმევით ევროპარლამენტის რეზოლუციაში არის მოწოდება ევროკავშირის ქვეყნებისადმი, რომ მათ ამ სიაში მყოფი ადამიანები შეიყვანონ თავიანთ სანქცირებულ ადამიანთა სიაში. ჩვენ გვაქვს ძალიან დიდი იმედი და მოვუწოდებთ ხელისუფლებას, რომ უფრო მეტი პასუხისმგებლობით მიუდგეს სიას და განავრცოს ის. შეიყვანოს მასში რუსეთის ფედერაციის მოქალაქეები და ეს პასუხისმგებლობა იყოს უფრო მეტი, ვიდრე არის დღეს.

ამ უპასუხისმგებლო დამოკიდებულების ერთ-ერთი გამოვლენა არის, რომ სიაში, სამწუხაროდ, შეყვანილი არიან ადამიანები, რომლებიც არიან გარდაცვლილები. ესეც მეტყველებს იმაზე, თუ როგორი არასერიოზული იყო მათი დამოკიდებულება ამ თემის მიმართ. ეს არის ძალიან მნიშვნელოვანი სია. ეს არის სია, რომელიც კონკრეტულ გზავნილს აგზავნის ოკუპირებულ ტერიტორიებზე მყოფი იმ ადამიანების მიმართ, რომლებიც ან არღვევენ საქართველოს მოქალაქეების უფლებებს ან შეიძლება მომავალში დაარღვიონ, რათა მათ კარგად გაიგონ, რომ ამის გამო მოუწევთ როგორც პოლიტიკური, ისე კონკრეტული ფასის გადახდა“, - განაცხადა დეპუტატმა.

მთავრობამ ოთხოზორია-ტატუნაშვილის სია დაამტკიცა, რომელშიც 33 პირი მოხვდა. სია დასამტკიცებლად პარლამენტს გადაეგზავნა.