სამართალი

ოთარ ფარცხალაძის ადვოკატები ლაშა თორდიას „აუდიტორთა ეთიკის კოდექსის“ დარღვევაში ადანაშაულებენ

ყოფილი მთავარი პროკურორის, ოთარ ფარცხალაძის ადვოკატები გენერალურ აუდიტორ ლაშა თორდიას „აუდიტორთა ეთიკის კოდექსის“ დარღვევაში ადანაშაულებენ.

შესაბამისი განცხადება ადვოკატებმა, მერაბ ჩიქოვანმა და გაგი მოსიაშვილმა საგანგებო ბრიფინგზე გააკეთეს.

"გუშინ გავრცელებული ინფორმაცია აუდიტორთა ეთიკის კოდექსს არღვევს. აუდიტის სამსახური ვალდებულია, რომ შემაჯამებელი დოკუმენტის მომზადებამდე დასკვნა წინასწარ არ გაასაჯაროვოს. თორდიამ მისი უწყების საქმიანობა პირადი მიზნებისთვის გამოიყენა. ეს ეთიკის კოდექსის მე-8 მუხლის მე-3 პუნქტის დარღვევაა, რომლის მიხედვითაც აუდიტორმა მისი საქმიანობის შედეგად მიღებული ინფორმაცია პირადი მიზნებისთვის არ უნდა გამოიყენოს. ეს ბრიფინგი საზოგადოების შეცდომაში შეყვანას ისახავდა მიზნად", - განაცხადა ადვოკატმა მერაბ ჩიქოვანმა.

მისივე თქმით, მერიას კომპენსაციის გაცემის ვალდებულება 2011-12 წლებში დაეკისრა და მათთვის გაუგებარია, რატომ არ ინტერესდება აუდიტის სამსახური ამ პერიოდით.

ცნობისთვის, სახელმწიფო აუდიტის სამსახურმა თბილისის მერიის მიერ ყოფილი მთავარი პროკურორის, ოთარ ფარცხალაძისთვის მიწების გადაცემის საკითხზე შუალედური დასკვნა 22 მაისს გამოაქვეყნა.