პოლიტიკა

ოთარ დანელია საქართველოში ნიდერლანდების სამეფოს ელჩს შეხვდა

აგრარულ საკითხთა კომიტეტის თავმჯდომარემ, ოთარ დანელიამ ნიდერლანდების სამეფოს საგანგებო და სრულუფლებიან ელჩთან საქართველოში, იოჰანეს დუმასთან გაცნობითი ხასიათის შეხვედრა გამართა.

საქართველოს პარლამენტის ინფორმაციით, მხარეებმა სოფლის მეურნეობის სფეროში თანამშრომლობის გააქტიურებასა და სამომავლო გეგმებზე ისაუბრეს.

ოთარ დანელიას განცხადებით, სოფლის მეურნეობის მიმართულებით, ნიდერლანდების სამეფო ერთ-ერთი წარმატებული ქვეყანაა და მისი გამოცდილების გაზიარება განსაკუთრებით მნიშვნელოვანია.

„ნიდერლანდების სამეფოში, სოფლის მეურნეობის სფეროში, ძალიან საინტერესო ტექნოლოგიური გადაწყვეტილებები აქვთ, რაც საინტერესოა ჩვენი ქვეყნისთვისაც. შეხვედრაზე ვისაუბრეთ ტექნოლოგიების გაცვლაზე, ერთობლივ ტრენინგებზე, აგრეთვე, იმ საუკეთესო პრაქტიკების დანერგვაზე საქართველოში, რაც ერთობ მნიშვნელოვანია ჩვენი სოფლის მეურნეობის კონკურენტუნარიანობის ამაღლებისთვის. საკითხი ეხება როგორც მეცხოველეობას, ასევე სასათბურე მეურნეობებს, ლოჯისტიკას და ყველა იმ სხვა მიმართულებას, რომლებიც ჩვენთვის სასიცოცხლოდ აუცილებელია. ამდენად, მნიშვნელოვანია, რომ ჰოლანდიის მთავრობის ხელშეწყობით, ისინი საქართველოში დაინერგოს“, - განაცხადა აგრარულ საკითხთა კომიტეტის თავმჯდომარემ შეხვედრის დასრულების შემდეგ.