პოლიტიკა

ოთარ აბესაძე პატიმრობაში დატოვეს

თბილისის მერიის ყოფილი თანამშრომელი ოთარ აბესაძე პატიმრობაში რჩება. მოსამართლემ არ დააკმაყოფილა დაცვის მხარის შუამდგომლობა აღკვეთი ღონისძიების შეცვლის შესახებ. ირმა ჭკადუამ მოითხოვა, რომ პატიმრობა 50 000-ლარიანი გირაოს შეფარდებით ყოფილიყო შეცვლილი.

მიუხედავად იმისა, რომ ოთარ აბესაძემ აღნიშნა, რომ საზოგადოებისთვის საფრთხეს არ წარმოადგენს, მოსამართლემ მიიჩნია, რომ მოწმეებზე ზეგავლენის საფრთხე კვლავ არსებობს.

თვითონ ოთარ აბესაძემ თავს ნაწილობრივ დამნაშავედ აღიარა. როგორც მან სასამართლო პროცესზე განაცხადა, ის მზადაა, გამოძიებასთან ითანამშრომლოს.

„მზად ვარ, პროკურატურასთან თანამშრომლობისთვის, მზად ვარ მხოლოდ იმ იურიდიულ ჩარჩოებში, რომელსაც მე და დაცვის მხარე მივიჩნევთ, რომ უნდა მიდიოდეს პროცესი. ნაწილობრივ ვიზიარებ პასუხისმგებლობას და ბოდიშს ვუხდი საზოგადოებას, უპირველეს ყოვლისა კი ჩემს ოჯახს შექმნილი ვითარების გამო“,- თქვა აბესაძემ.

შეგახსენებთ, ანტიკორუფციულმა სააგენტომ ოთარ აბესაძე 12 ივლისს დააკავა. მას ბრალად ედება ქრთამის სახით 3000 დოლარის აღება მდინარე მტკვარზე, ტივზე არსებული კაფისა და შესაბამისი ინფრასტრუქტურის მოწყობისათვის საჭირო ნებართვების გაცემის პროცედურის დასაჩქარებლად.

გამოძიება ქრთამის აღების ფაქტზე, საქართველოს სსკ-ის 338-ე მუხლის პირველი ნაწილით გათვალისწინებული დანაშაულის ნიშნებით მიმდინარეობს, რაც სასჯელის სახით ექვსიდან ცხრა წლამდე თავისუფლების აღკვეთას ითვალისწინებს.

ანა მებურიშვილი