სამართალი

ოთარ აბესაძე გამოკვლევებისთვის საავადმყოფოშია გადაყვანილი

ქრთამის აღების ბრალდებით დაკავებულ მერიის ყოფილი თანამშრომელს, ოთარ აბესაძეს კომპლექსური გამოკვლევა სასამართლო ექსპერტის მეთვალყურეობით უტარდება. ოთარ აბესაძე გამოკვლევებისთვის კლინიკაში გადაიყვანეს.

ექსპერტი ამბობს, რომ სავარაუდოდ კვირის ბოლოს უკვე ცნობილი იქნება გამოკვლევის შედეგი, რის შემდეგაც ის უკვე საბოლოო დასკნას მოაზადებს ოთარ აბესაძის ჯანმრთელობის მდგომარეობის შესახებ.

,,დანიშნულია კომპლექსური სასამართლო-სამედიცინო ექსპერტიზა და ფსიქოლოგიური ექსპერტიზა ერთობლივ რეჟიმში. შესაბამისად, მოწვეული გვყავს მაღალკვალიფიციური პროფესიონალი ექსპერტები. მიმდინარეობს ბრალდებულის კვლევა ყველა მიმართულებით. საექსპერტო დაწესებულების მიერ უნდა გაიცეს დასკვნა იმასთან დაკავშირებით, თუ რა მდგომარეობა აქვს რეალურად ბრალდებულს, მკურნალობისთვის, რა რეკომენდაციებია საჭირო და როგორია მისი ჯანმრთელობის მდგომარეობის სიმძიმე ამ ეტაპზე“, - ამბობს ექსპერტი ალექსანდრე გეჯაძე ტვ ,,პირველთან“ საუბარში.

თავის მხრივ, როგორც ოთარ აბესაძის ადვოკატი, ირმა ჭკადუა ამბობს, ექსპერტიზის დასკვნის შესაბამისი იქნება დაცვის მხარის სამართლებრივი ნაბიჯები.

,,სასამართლოს გადაწყვეტილებები, რომელიც ბოლო პერიოდში მიიღო აღკვეთის ღონისძიების სახედ პატიმრობის ძალაში დატოვებასთან დაკავშირებით, არის დაუსაბუთებელი და ჩვენ ამას აუცილებლად გავასაჩივრებთ ადამიანის უფლებათა ევროპულ სასამართლოში“, - აცხადებს ირმა ჭკადუა.