პოლიტიკა

ორპალატიანი პარლამენტის შემოღებისთვის საქართველო დღეს მზად არ არის, თუმცა კომისიაში ამაზე ვიმსჯელებთ - ირაკლი კობახიძე

საქართველოს პარლამენტისა და სახელმწიფო საკონსტიტუციო კომისიის თავმჯდომარის, ირაკლი კობახიძის განცხადებით, საკონსტიტუციო კომისიაში ორპალატიანი პალამენტის შემოღების საკითხი განიხილება, თუმცა მისი აზრით, საქართველო ამისთვის დღეს მზად არ არის.

როგორც კობახიძემ შსს-ს პოლიციის აკადემიაში მედიას განუცხადა, ეს საკითხი ქვეყნის ტერიტორიული მთლიანობის საკითხთან არის პირდაპირ კავშირში.

„პირდაპირ არის დაკავშირებული საქართველოში ბიკამერალიზმის შემოღება, ანუ ორპალატიანი პარლამენტის შემოღება, იურისდიქციის აღდგენის საკითხთან. აქედან გამომდინარე, რა თქმა უნდა, ამაზე მსჯელობა უნდა შედგეს, თუმცა ვფიქრობ, რომ ამ ეტაპზე საქართველო არ არის მზად იმისთვის, რომ ჩამოყალიბდეს ორპალატიანი საპარლამენტო სისტემა. ეს იქნება ჩემი ზოგადი კომენტარი. ვნახოთ, ამაზე ვიმჯჯელებთ კომისიის ფორმატში და საბოლოო ჯამში იქ მიიღება შესაბამისი გადაწყვეტილება“,-აღნიშნა საკონსტიტუციო კომისიის თავმჯდომარემ.

ირაკლი კობახიძემ, შსს-ს აკადემიის პროექტის - „საჯარო ლექციები შსს-ს აკადემიის სტუდენტებისთვის“ ფარგლებში, ბაკალავრიატისა და მაგისტრატურის სტუდენტებს საჯარო ლექცია ჩაუტარა.

მონიკა დავლიანიძე