პოლიტიკა

ოპოზიციური პარტიები ადგილობრივი თვითმმართველობის არჩევნებზე გამოვლენილ დარღვევებზე რეაგირებისთვის სტრასბურგს მიმართავს

ოპოზიციური პარტიები ადამინის უფლებათა ევროპულ სასამართლოს ადგილობრივი თვითმმართველობის არჩევნებზე გამოვლენილ დარღვევებზე რეაგირებისთვის მიმართავს.17-მა პოლიტიკურმა სუბიექტმა ერთობლივ სარჩელს მოაწერა ხელი, სადაც კონკრეტული ფაქტების შესწავლასა და არჩევნების შედეგების გადახედვას ითხოვენ.

ოპოზიციური პარტიები ხელისუფლებისადმი რეკომენდაციების გაცემას მოითხოვენ, რაც, შესაძლებელია, ხმების ხელახლა გადათვლას გულისხმობდეს.

სტრასბურგში გასაგზავნ სარჩელზე ხელმომწერთა შეფასებით, მმართველმა გუნდმა თავისი ქმედებებით შეძლო და მთელი ოპოზიციური სპექტრი გააერთიანა მის წინააღმდეგ. ხელმომწერთა შორის საპარლამენტო ოპოზიციის წევრებიც არიან.

ადამიანის უფლებათა ევროპულ სასამართლოში შესაბამისი სარჩელი უახლოეს დღეებში შევა.

„ამ წუთიდან, დედამიწის პოლიტიკურ რუკაზე, ერთადერთი ქვეყანაა, საქართველო რომლის ხელისუფლება აღიარებს საკუთარ თავს და მას არ აღიარებს არც ერთი პოლიტიკური პარტია. ეს არის უნიკალური ფორსმაჟორული სიტუაცია და თუ დარჩა რეჟიმს პატარა ჭკუა და თვითგადარჩენის ინსტინქტი, დროა ჩაალაგოს ბარგი, დაგვემშვიდობოს და იფიქროს ძალაუფლების ხალხისათვის დაბრუნებაზე,“ -განაცხადა „ლეიბორისტული“ პარტიის ლიდერმა შალვა ნათელაშვილმა.

ქვეყანაში ჩატარებულ არჩევნებს უნდობლობას უცხადებს „დემოკრატიული მოძრაობა - ერთიანი საქართველოს” თავმჯდომარე ნინო ბურჯანაძეც.

პარტია ”თავისუფალი საქართველოს” თავმჯდომარე კახა კუკავა კი ამბობს, რომ ადამიანის უფლებათა ევროპულმა სასამართლომ თავდაპირველად დარღვევები უნდა გამოავლინოს.

„სტრასბურგის სასამართლოს კომპეტენციიდან გამომდინარე, მან პირველ რიგში უნდა დაადგინოს დარღვევები, კანონის და უფლებათა დარღვევები. აქედან გამომდინარე, ის აძლევს ხელისუფლებას რეკომენდაციებს, ეს შეიძლება იყოს ძიების ჩატარება, ასევე გადათვლა და კომპენსაცია,“ - განაცხადა კუკავამ.

საქართველოს ეროვნულ-დემოკრატიული პარტიის თავმჯდომარე ბაჩუკი ქარდავა აცხადებს, რომ საზოგადოებას იმედი უნდა მიეცეს, რომ ქვეყანაში ხელისუფლებები არჩევნების გზით შეცვლის პრინციპი დამკვიდრდა.

„შეეშვან სახელმწიფო ინსტიტუტების განადგურებას. მისცენ ქართველ ხალხს 2018 წლის არჩევნებში თავისუფლად აირჩიოს თავისი ქვეყნის მეთაური,“ - განაცხადა ბაჩუკი ქარდავამ.

ცირა გურგენიძე