პოლიტიკა

ოპოზიციაში აცხადებენ, რომ აქციის ჩასატარებლად „აბსოლუტურად ყველა ადგილი განიხილება“, მათ შორის თელავიც

„ნაციონალური მოძრაობის“ წევრის, თინა ბოკუჩავას განცხადებით, გაერთიანებული ოპოზიცია საპრეზიდენტო არჩევნების ლეგიტიმურობას არ აღიარებს.

რაც შეეხება აქციის ჩატარების ადგილს, ბოკუჩავამ განაცხადა, რომ კონსულტაციები მიმდინარეობს.

„არაღიარებული არჩევნების შედეგად ხელდასმული პრეზიდენტი ბრჭყალებში ინაუგურაციაზე ცხადია, ჩვენ დასწრებას არ ვაპირებთ, თუმცა ამის სურვილი არც არის ხელისუფლების მხრიდან.

აქციასთან დაკავშირებითაც გაგრძელდება ეს კონსულტაციები და შევარჩევთ ისეთ ადგილს, ისეთ ფორმას, ისეთ მასშტაბს, რომელიც ყველაზე მისაღები, ყველაზე ეფექტური, ყველაზე სწორი იქნება ჩვენი ქვეყნისთვის ამ კონკრეტულ მომენტში“, - განაცხადა ბოკუჩავამ.

კითხვაზე განიხილება თუ არა აქციის ჩატარების ადგილად თელავი, სადაც სალომე ზურაბიშვილის ინაუგურაცია უნდა ჩატარდეს, ბოკუჩავამ უპასუხა, რომ „განიხილება აბსოლუტურად ყველა ადგილი“.