პოლიტიკა

ოპოზიცია გრიგოლ ვაშაძის მხარდასაჭერად ერთიანდება და კონსულტაციებს იწყებს

ოპოზიცია საპრეზიდენტო კანდიდატის, გრიგოლ ვაშაძის მხარდასაჭერად ერთიანდება და კონსულტაციებს იწყებს.

კონსულტაციების შედეგად გაირკვევა, ვინ გაერთიანდება საკოორდინაციო შტაბში და როგორი იქნება პოლიტიკური პარტიების სამოქმედო გეგმა. ოპოზიციის ლიდერები მოლაპარაკებებზე ყველა ოპოზიციურ პარტიას ელოდებიან. ხელისუფლების ოპონენტები აცხადებენ, რომ ისინი არჩევნებისას მიღებულ ყველა ხმას დაიცავენ.

„იმისთვის, რომ ჩვენ დავამარცხოთ ივანიშვილი ამისთვის აუცილებელია, რომ გაერთიანდეს ყველა პროდასავლური ოპოზიციური პარტია. ჩვენ ამ გაერთიანებას ჩავუყარეთ საფუძველი, როცა თერთმეტმა პარტიამ წარადგინა გრიგოლ ვაშაძე, როგორც გაერთიანებული ოპოზიციის კანდიდატი.

ჩვენი კარი ღია არის ყველა პროდასავლური პარტიისთვის რომელსაც სურს შემოუერთდეს ამ გაერთიანებას,“-აცხადებს „ნაციონალური მოძრაობის“ ერთ-ერთი ლიდერი სალომე სამადაშვილი.

გაერთიანების აუცილებლობაზე საუბრობენ „ ევროპულ საქართველოშიც“. პარტიის ერთ-ერთი ლიდერი ზურაბ ჭიაბერაშვილი აცხადებს, რომ მიუხედავად განსხვავებული შეხედულებებისა რიგ საკითხებზე გაერთიანება აუცილებელია.

„ევროპული საქართველო მიუხედავად ჩვენი განსხვავებებისა "ნაციონალურ მოძრაობასთან,“ საჭიროდ თვლის, რომ ეს მუშაობა იყოს კოორდინირებული და ამიტომაც გამოვიდა დავით ბაქრაძე იდეით, რომ შეიქმნას საკოორდინაციო საბჭო,“-აცხადებს ჭიაბერაშვილი.