პოლიტიკა

ოპონენტების მხრიდან საუბარი სესხების განულების ინიციატივაზე საფუძველსაა მოკლებული - მამუკა ბახტაძე

საქართველოს პრემიერ-მინისტრის, მამუკა ბახტაძის განცხადებით, ოპონენტების განცხადებები შავ სიაში მყოფი მოქალაქეებისთვის სესხის განულების ინიციატივის შესახებ საფუძველსაა მოკლებული.

მისივე თქმით, ეს დაპირება ჯერ კიდევ მისი ფინანსთა მინისტრობის დროს გასცა და მაშინვე აანონსებდა, რომ ე.წ. შავი სიის პრობლემა შემოდგომაზე მოგვარდებოდა.

„მინდა ვისაუბრო სესხების განულების ინიციატივაზე. ჯერ კიდევ შარშან, წლის ბოლოს, როცა მე დავინიშნე ფინანსთა მინისტრად, გაზაფხულზე, ზაფხულში, ვაცხადებდი, რომ შემოდგომაზე ჭარბვალიანობის ერთ-ერთ ყველაზე მსხვილი და პრობლემური კომპონენტის, ე.წ. შავი სიის პრობლემის გადაწყვეტა მოხდებოდა სწორედ შემოდგომაზე. ჩვენ ეს გავაკეთეთ.

ეს არის ძალიან მნიშვნელოვანი ნაბიჯი, რომელსაც მოჰყვება ძალიან ბევრი დადებითი შედეგი ჩვენი მოსახლეობისთვის, ასევე ჩვენი ეკონომიკისთვის. საუბარი ოპონენტების მხრიდან, რომლებიც ხშირად არასწორ ინფორმაციას აწვდიან მოქალაქეებს, არის სრულიად საფუძველს მოკლებული. ამას ყველა შემთხვევაში გავაკეთებდით, ისევე როგორც ყველა შემთხვევაში განვახორციელებთ ყველა იმ ინიციატივას, რომელიც აიღო მთავრობამ დამტკიცების დროს“, - განაცხადა ბახტაძემ.

ცნობისთვის, საქართველოს მთავრობის გადაწყვეტილებით, ე.წ. „შავ სიაში“ მოხვედრილ 600 000-ზე მეტ მოქალაქეს საბანკო დავალიანება გაუნულდება.