სამართალი

„ომეგა ჯგუფში“ შემავალი კომპანიის დირექტორები დღეს პროკურატურაში გამოიკითხებიან

თბილისის პროკურატურაში გამოკითხვის მიზნით, მოწმის სახით გამოძახებული არიან „ომეგა ჯგუფში“ შემავალი სამი კომპანიის დირექტორები. ადვოკატ გიორგი ფანცულაიას ცნობით, აღნიშნული პირები საგამოძიებო ორგანოში დღეს გამოცხადდებიან.

დღეს საგამოძიებო უწყებაში ყველა ის პირია დაბარებული, რომლებზეც სავარაუდოდ ზეწოლა მიმდინარეობდა. ადვოკატის ინფორმაციით, რა სახის იყო ეს ზეწოლა და კონკრეტულად ვინ მონაწილეობდა ამ პროცესში, დეტალურ ინფორმაციას ამის შესახებ გამომძიებლებს კომპანიის წარმომადგენლები მიაწვდიან.

„„ომეგა ჯგუფში“ შემავალი კომპანიების დირექტორები დაბარებულები არიან ქალაქ თბილისის პროკურატურაში. ჩვენი ამოსავალი წერტილი არის ის, რომ ამ საქმეზე გამოძიებას მაქსიმალურად ხელი შევუწყოთ. აღნიშნული პირები თუ რაიმე ინფორმაციას ფლობენ ამასთან დაკავშირებით ისინი მაქსიმალურად ითანამშრომლებენ, მიაწვდიან ინფორმაციას,“-აცხადებს ტელეკომპანია „იბერიას“ ადვოკატი გიორგი ფანცულაია.

ცნობისთვის, მედიაში გავრცელებულ აუდიოჩანაწერებთან დაკავშირებით თბილისის პროკურატურამ გამოძიება 2018 წლის 12 სექტემბერს დაიწყო. აღძრულ სისხლის სამართლის საქმეს თან დაერთო ყველა ის აუდიოჩანაწერი, რომელიც გამოძიების მიმდინარეობისას სხვადასხვა მედიასაშუალებებით დამატებით გავრცელდა.