სამართალი

„ომეგა ჯგუფში“ შემავალი „ბეემვეს ცენტრის` დირექტორის მოადგილემ სასამართლოში გამოკითხვა მოითხოვა.

„ომეგა ჯგუფში“ შემავალი „ბეემვეს ცენტრის" დირექტორის მოადგილემ ალექსანდრე ხაჩიშვილმა სასამართლოში გამოკითხვა მოითხოვა.

ხაჩიშვილმა თბილისის პროკურატურა ისე დატოვა, რომ გამომძიებლების შეკითხვებზე არ უპასუხია.

„ვისარგებლე კანონით მონიჭებული უფლებით, რომ სასამართლოს წინაშე, მოსამართლის თანდასწრებით მივცე ჩვენება", - აღნიშნა ხაჩიშვილმა პროკურატურიდან გამოსვლის შემდეგ.

სწორედ ხაჩიშვილი მონაწილეობდა „თიბისი“ ბანკიდან 4 მილიონის გატანის პროცესში. ხაჩიშვილმა თანხის გატანის დღე გაიხსენა და თქვა, რომ ბანკში ოთხ თანამშრომლებთან ერთად იმყოფებოდა, ხოლო თანხის მანქანაში ჩადების შესახებ სპორტის ყოფილმა მინისტრმა, ლევან ყიფიანმა უთხრა.

ხაჩიშვილის თქმით, მანქანაში აკაესის ტიპის იარაღი იდო და მიმდებარე ტერიტორიაზე შეიარაღებული პირებიც იმყოფებოდნენ.

„მანქანაში რომ უნდა ჩამედო თანხა მითხრა ლევან ყიფიანმა. მანქანა არ მეცნო, მანქანა უცნობი იყო ჩემთვის, ჯიპის ტიპის იყო, დაბურულ მინებიანი, აკაესის სისტემის მოკლე ავტომატური იარაღი იდო“, - განაცხადა ხაჩიშვილმა.

ადვოკატმა, გიორგი ფანცულაიამ აღნიშნა, გამომძიებლებს "თიბისი" ბანკთან დაკავშირებული მოვლენები აინტერესებდათ.

ცნობისთვის, „ომეგა ჯგუფის“ საქმესთან დაკავშირებით არაერთი აუდიოჩანაწერი გავრცელდა,რომელზეც პროკურატურამ გამოძიება 12 სექტემბერს, 180-ე მუხლის მესამე ნაწილის "ბ" ქვეპუნქტით დაიწყო, რაც სხვისი კუთვნილი დიდი ოდენობით ფულადი თანხის მოტყუებით დაუფლებას გულისხმობს.