პოლიტიკა

„ომეგა ჯგუფში“ გაერთიანებული რომელიმე კომპანიის აღიარებული დავალიანება არ შეიძლება იყოს განხილული, როგორც ზეწოლა „იბერიაზე“ - ბიზნესომბუდსმენი

საქართველოს ბიზნესომბუდსმენმა ირაკლი ლექვინაძემ ტელეკომპანია „იბერიას“ დახურვაზე კომენტირებისას განაცხადა, რომ „ომეგა ჯგუფის“ დავალიანება არ უნდა იყოს განხილული ტელეკომპანიაზე ზეწოლად.

„ერთი კომპანიის მაგალითზე, რომელსაც დეკლარირებული აქვს საგადასახადო ვალდებულებები, რომელიც გამოყენებულია პოლიტიკური დისკუსიის თემად – თქმა იმისა, რომ ქვეყანაში არსებობს ზეწოლა ბიზნესზე ან თავისუფალ მედიაზე, შეუძლებელია და არაკორექტულია. „ომეგა ჯგუფში“ გაერთიანებული რომელიმე კომპანიის აღიარებული დავალიანება არ შეიძლება დაკავშირებული იქნეს ამავე ჯგუფში შემავალ სხვა კომპანიების მოქმედებებთან და არ შეიძლება ეს განხილული იყოს, როგორც ზეწოლა ბიზნესჯგუფში შემავალ ტელეკომპანიაზე. „ომეგა ჯგუფში“ შედის სხვა კომპანიებიც, რომლებიც აგრძელებენ ჩვეულ რეჟიმში ფუნქციონირებას“, – განაცხადა ლექვინაძემ.

მისივე თქმით, „ომეგა ჯგუფის“ საკითხი გასცდა ბიზნესპროცესების ჩარჩოს და იქცა ოპოზიციური პარტიების პოლიტიკური დღის წესრიგის ერთ-ერთ მთავარ თემად.

„იმ კომპეტენციიდან გამომდინარე, რომელიც გააჩნია ბიზნესომბუდსმენის აპარატს, ჩვენ გვქონდა საკმაოდ აქტიური თანამშრომლობა კომპანიასთან, შევისწავლეთ აღნიშნული საკითხი. „ომეგა ჯგუფი“ აერთიანებს რამდენიმე ბიზნესმიმართულებას. სიგარეტის მწარმოებელ საწარმოს სახელმწიფოს წინაშე დღეს აქვს 50 მლნ. ლარზე მეტი მოცულობის დეკლარირებული დავალიანება. კიდევ ერთხელ აღვნიშნავ, რომ კომპანიის დახმარების ძალიან ბევრი მცდელობა იყო. რეკომენდაციაც მოვამზადეთ, რომ „ომეგა ჯგუფთან“ მიმართებაში განხილულიყო დავალიანების რესტრუქტურიზაცია, თუმცა იმის ნაცვლად, რომ საკითხი საქმიან ჭრილში განხილულიყო, პოლიტიკური დისკუსიის საგნად იქცა“, – განაცხადა ბიზნესომბუდსმენმა.

„ხელისუფლებამ დახურა იბერია“, - მას შემდეგ, რაც ტელეკომპანია „იბერიამ“ დახურვის შესახებ განაცხადა, ეთერში საპროტეტსო წარწერა გადის. ამას წინ უძღოდა არხის მფლობელების - დეპუტატ ნატო ჩხეიძისა და ბიზმესმენ ზაზა ოქუაშვილის განცხადებები, რომ მთავრობა „ომეგა ჯგუფისთვის“ ფინანასური პრობლემების შექმნით ცდილობს ტელევიზიის დახურვას.