პოლიტიკა

„ომეგა ჯგუფის“ საქმე პარლამენტარებს შორის დაპირისპირების მიზეზი გახდა

„ომეგა ჯგუფისა“ და მასთან დაკავშირებით გამოქვეყნებულმა ჩანაწერებმა პარლამენტის დღევანდელი ბიუროს სხდომაზე ხმაური გამოიწვია. „ევროპული საქართველოს“ წევრებმა სერგი კაპანაძემ და აკაკი ბობოხიძემ „ომეგა ჯგუფის“ საქმეზე შინაგან საქმეთა მინისტრისა და მთავარი პროკურორის მოსვლა მოითხოვეს.

პარლამენტის ვიცე-სპიკერმა ირმა ინაშვილმა „ევროპული საქართველოს“ წევრს, აკაკი ბობოხიძეს მიმართა სიტყვებით: „დაახვიე ახლა აქედან“.

უმცირესობის წარმომადგენლებმა უმრავლესობის წევრებს მიმართეს ერთგვარი რიტორიკული კითხვით, იყო თუ არა ეს ის საკითხი, რაზეც პარლამენტს რეაგირება უნდა მოახდინა და შესაბამისი უწყებები დაებარებინა.

საბოლოოდ დისკუსიაში უშუალოდ პარლამენტის თავმჯდომარე ირაკლი კობახიძე ჩაერთო. კობახიძემ უმცირესობის ბრალდებებს კონტბრალდებებით უპასუხა და 9-წლიან რეჟიმზე გაამახვილა ყურადღება.