სამართალი

,,ომეგა ჯგუფის’’ საკითხზე გამოძიება კვლავაც გრძელდება - პროკურორი

,,ომეგა ჯგუფში’’ შემავალ კომპანიების წილების დათმობის მიზნით კომპანიების ხელმძღვანელობაზე განხორცილებეულ ზეწოლასთან დაკავშირებით გამოძიება კვლავაც მიმდინარეობს.

ინფორმაცია ამის შესახებ ჟურნალისტებს “იბერია ტვ”-ს საქმის პროკურორმა, ემზარ გაგნიძემ დღევანდელი სასამართლო სხდომის დასრულების შემდეგ მიაწოდა, რომელზეც ბრალდების მხარის მოწმე, ირაკლი ბათიაშვილი დაიკითხა.

საუბარია 2003-2004 წლებში იმჟამინდელი ხელისუფლების წარმომადგენლების მხრიდან ,,ომეგა ჯგუფში’’ შემავალი კომპანიების წილების გადაფორმების მიზნით ზაზა ოქუაშვილზე ზეწოლის საკითხზე.

როგორც ტელეკომპანია ,,იბერიას’’ საქმეზე გამართულ დღევანდელ სასამართლო სხდომაზე ბრალდების მხარის მოწმემ, ირაკლი ბათიაშვილმა აღნიშნა, ზეწოლას ზაზა ოქუაშვილზე შუამავლების, კერძოდ კი, ბადრი პატარაკაციშვილისა და ქიბარ ხალვაშის საშუალებით სავარაუდოდ, ახორცილებდნენ ვანო მერაბიშვილი და ირაკლი ოქრუაშვილი.

,,ზაზასთან იყო მისული ქიბარ ხალვაში და ისიც არწმუნებდა, რომ კარგი იქნებოდა, მისთვისვე კომპანიების საკონტროლო პაკეტი გადაეფორმებინა. მითხრა, ვანო მერაბიშვილისგან და ირაკლი ოქრუაშვილისგან არის მგონი მოსულიო. ვერ მივხვდი, ეს მისი ეჭვი იყო, თუ ზუსტად იცოდა. ის სთავაზობდა, რომ დაეთმო ჰოლდინგის საკონტროლო პაკეტი და მათ შორის იბერია ტვ-ის ლიცენზია. ზაზამ უარი უთხრა და მას შემდეგ, ხალვაში აღარ მისულა მასთან’’, - აღნიშნა მოწმემ.

მისივე ინფორმაციით, რაც შეეხება ბადრი პატარკაციშვილის ერთ-ერთ შეხვედრას ზაზა ოქუაშვილთან, იქ აღინიშნა, რომ ჩამონათვალში, ვისზეც უნდა გადაფორმებულიყო წილები ნახსენები იყო მიხეილ საკაშვილი და კიდევ რამდენიმე პირი.

,,ჩამონათვალში იყო ბეჟუაშვილი, ვანო ჩხარტიშვილიც ფიგურურებდა, მგონი, თავად ბადრიც და მგონი, ირაკლი ოქრუაშვილიც ფიგურირებდა’’, - განაცხადა ირაკლი ბათიაშვილმა.

თავის მხრივ, როგორც პროკურორმა, ემზარ გაგნიძემ აღნიშნა, „იბერია ტვ“-ს ლიცენზიის იძულებით დათმობის საქმე ცალკე წარმოებადაა გამოყოფილი ,,ომეგა ჯგუფის’’ საკითხთან დაკავშირებით მიმდინარე გამოძიებიდან.

,,მოწმე ირაკლი ბათიაშვილმა სასამართლოს წინაშე დაადასტურა ორი ფაქტი, ერთი - ,,ომეგა ჯგუფის’’ მიმართ განხორციელებული დანაშაულებრივი ქმედებები. კერძოდ კი, ხელისუფლების მხრიდან ზეწოლებზე ისაუბრა. ზაზა ოქუაშვილს იმჟამინდელი ხელისუფლება აიძულებდა, რომ დაეთმო ,,ომეგა ჯგუფის’’ საკონტროლო პაკეტი 51%-იანი წილი, რომელიც საბოლოო ჯამში 65 %-ად გარდაიქმნა.

რაც შეეხება თვითონ გახმაურებული პიროვნებების სახელებს და გვარებს, რომელიც გაჟღერდა ,,ომეგა ჯგუფის’’ საკითხთან მიმართებაში, ამასთან დაკავშირებით გამოძიება გრძელდება. ამ გამოძიებიდან ცალკე წარმოებადაა გამოყოფილი სწორედ ,,იბერია ტვ’’-ის ნაწილში სისხლის სამართლის საქმე და ამ ნაწილში ბრალი წარდგენილი აქვთ იმ დროინდელ გენერალურ პროკურორ, ზურაბ ადეიშვილს და მის მოადგილეს, გიორგი ლაცაბიძეს’’, - განაცხადა პროკურორმა.

ნინო ექვთიმიშვილი