პოლიტიკა

„ომეგა ჯგუფის“ ერთ-ერთი თანამშრომელი პოლიციამ წაიყვანა, საფრთხის ქვეშ ვართ - „იბერიას“ საგანგებო განცხადება

ტელეკომპანია „იბერიას“ საინფორმაციო სამსახურის ხელმძღვანელმა ვახო ხუზმიაშვილმა „ომეგა ჯგუფის“ საქმეზე საგანგებო განცხადება გააკეთა.

მისი ინფორმაციით, პოლიციაში გადაყვანილია „ომეგა ჯგუფის“ თანამშრომელი, რომელსაც სამი წლის წინ იარაღი შემთხვევით გაუვარდა, თუმცა არავინ არ დაშავებულა „შეტევა „ომეგასა“ და „იბერიას“ თანამშრომლებზე. რამდენიმე წუთის წინ ცნობილი გახდა, რომ „ომეგა ჯგუფის“ ერთ-ერთი თანამშრომელი, რომელიც „იბერია-ომეგას“ საქმეში ლევან ყიფიანის ეპიზოდში ფიგურირებს, პოლიციაში წაიყვანეს. საქმე ეხება 2015 წელს მომხდარ უბედურ შემთხვევას, რომლის დროსაც, ჩვენს ხელთ არსებული ინფორმაციით, თოლორდავა დაიჭრა, მას იარაღი გაუვარდა. საბედნიეროდ, ის გადარჩა. თოლორდავა ახლაც „ომეგას“ თანამშრომელია.

ემთხვევიდან 3 წლის შემდეგ მისი პოლიციაში გადაყვანა, ჩვენი ღრმა რწმენით, უკავშირდება „ომეგასა“ და იბერიას“ თანამშრომლების მიმართ რეპრესიებს დაწყებას. ჩვენ, ტელეკომპანია „იბერიასა“ და „ომეგა ჯგუფის“ თანამშრომლები ვთვლით, რომ ვართ საფრთხის ქვეშ და იმ შემთხვევაში, თუ რომელიმე ჩვენგანზე განხორციელდება რაიმე სახის პროვოკაცია, თავდასხმა ან ზეწოლა, სრულ პასუხისმგებლობას ვაკისრებთ საქართველოს ხელისუფლებას. მივმართავთ არასამთავრობო ორგანიზაციებს, უფლებადამცველებს, დიპლომატიურ კორპუსს, დაიცვან ჩვენი უსაფრთხოება“, - განაცხადა ხუზმიაშვილმა.