პოლიტიკა

ოკუპირებული ტერიტორიებზე საუბარი იქნება პოროშენკოს საქართველოში ვიზიტის დროს - უკრაინის ელჩი

დღეს საგარეო საქმეთა სამინისტროში უწყების მინისტრის მოადგილემ დავით დონდუამ საქართველოში აკრედიტებულ დიპლომატიურ კორპუსთან შეხვედრა გამართა საქართველოს ოკუპირებულ ტერიტორიებზე ბოლო დროს შექმნილ ვითარებაზე.

როგორც უკრაინის ელჩმა, იგორ დოლგოვმა შეხვედრის დასრულების შემდეგ განაცხადა, საუბარი იყო მცოცავი ოკუპაციის კონკრეტულ ფაქტებზე. ელჩის თქმით, რუსეთის მიერ საქართველოს ოკუპირებული ტერიტორიები იქნება ერთ-ერთი მთავარი თემა უკრაინის პრეზიდენტ პეტრო პოროშენკოს საქართველოში ვიზიტის დროს.

„სამწუხაროდ, ყოველდღე უფრო და უფრო გასაგები ხდება, რომ რუსეთის აგრესიული ქმედებები მიმართულია ქართველი ხალხის წინააღმდეგ, მშვიდობისა თუ ნებისმიერი რომელიმე სხვა შეთანხმების წინააღმდეგ. ჩვენ, უკრაინაში, სამწუხაროდ, ვიცით რუსეთის დაპირებების ფასი, რომლის ნდობა არ შეიძლება. რაც საოკუპაციო ზოლთან ხდება, ეს ადამიანის უფლებების უპრეცედენტო დარღვევაა. ეს პრობლემები ჩვენთან ახლოა და ამ თემაზე საუბარი იქნება პოროშენკოს საქართველოში ვიზიტის დროს.

დღევანდელ შეხვედრაზე ჩვენ ვისაუბრეთ ფაქტებზე, რომლებიც ადასტურებს, რომ ყოველდღიურად ხდება მცოცავი ოკუპაცია, უფრო და უფრო საშიში და საგანგაშო ხდება ე.წ. ბორდერიზაცია და მშვიდობის ნაცვლად რუსეთი უფრო აძლიერებს საკუთარ სამხედრო ყოფნას ოკუპირებულ ტერიტორიებზე, რაც საგანგაშო სიგნალია“, - განაცხადა უკრაინის ელჩმა.