სამართალი

ოფისში მოვიდა ადამიანი და განაცხადა, რომ ერთ-ერთი მსჯავრდებულის ოჯახი დაუკავშირდა და ჩვენების შეცვლა მოსთხოვა- გაგი მოსიაშვილი ე.წ კორტების საქმეზე

ე.წ. კორტების სპეცოპერაციის შედეგად გარდაცვლილი ზურაბ ვაზაგაშვილის ოჯახის ადვოკატის ინფორმაციით, საქმის ერთ-ერთ მოწმეზე ზეწოლასა და მუქარას ჰქონდა ადგილი.

როგორც ადვოკატმა გაგი მოსიაშვილმა განაცხადა, მოწმის მიერ გაჟღერებული ინფორმაცია ვიდეოფირზეა დაფიქსირებული.

„ჩვენთან ოფისში მოვიდა ადამიანი, რომელმაც განაცხადა, რომ კორტების სპეცოპერაციის საქმეზე ერთ-ერთი მსჯავრდებულის ოჯახი დაუკავშირდა და გარკვეული თანხის სანაცვლოდ გამოძიების ეტაპზე და სასამართლოში მიცემული ჩვენების შეცვლა მოსთხოვა. საუბარია ერთ-ერთ მსჯავრდებულზე, რომლის მიმართაც ორი ინსტანციის სასამართლოში გამამტყუნებელი განაჩენი გამოტანილია. ამ მოწმის მიერ მოწოდებული ინფორმაცია ჩვენ დავაფიქსირეთ ვიდეოფირზე, რა თქმა უნდა, მისი თანხმობის შესაბამისად. აღნიშნულ ჩანაწერს და განცხადებას, გამოძიების დაწყების მოთხოვნით, ჩვენ დღეს შევიტანთ პროკურატურაში. ვიმედოვნებთ, რომ პროკურატურა სწრაფად მოახდენს რეაგირებას აღნიშნულ განცხადებაზე“,-განაცხადა გაგი მოსიაშვილმა.

მოსიაშვილის თქმით, გამოძიებით დასადგენია რამდენად რეალურია ის ინფორმაცია, რომელიც მათ ე.წ. კორტების სპეცოპერაციის საქმის მოწმემ მიაწოდა.

მონიკა დავლიანიძე