სამართალი

ოჯთ-ის დირექტორი მზად არის გამოძიების კითხვებს ამომწურავად უპასუხოს

„ომეგა ჯგუფში“ შემავალი ერთ-ერთი კომპანიის, „ოჯთ“-ის დირექტორი, ნიკოლოზ ასანიძე მზად არის გამოძიების კითხვებს ამომწურავად უპასუხოს.

ნიკოლოზ ასანიძე პროკურატურაში ადვოკატ გიორგი ფანცულაიასთან ერთად მივიდა.

„როგორც კანონმორჩილი მოქალაქე, გამოვცხადდი დანიშნულ დროზე. საუბარი გვქონდა გამომძიებელთან. რა თქმა უნდა, ჩვენს ინტერესშია, რომ გამოძიება სრულყოფილად წარიმართოს. ყველა შეკითხვაზე, რომელიც იქნება დასმული, გავცემ სრულ და ამომწურავ პასუხს, რათა გამოძიებას ხელი შეეწყოს კარგად წარიმართოს საქმე. დაველოდოთ მოვლენების განვითარებას და ყველაფრს მას შემდეგ მოგახსენებთ, როდესაც გამომკითხავენ“,- განაცხადა ასანიძემ.

ამასთან, ადვოკატმა, გიორგი ფანცულაიამ არ გამორიცხა, რომ ნიკოლოზ ასანიძემ ჩვენება შესაძლოა, სასამართლოს მისცეს.

ადვოკატის თქმით, ნიკოლოზ ასანიძე არის ერთ-ერთი მნიშვნელოვანი მოწმე, რომლის ჩვენებაც აღნიშნულ საქმეში ასევე მნიშვნელოვანი იქნება.

„დღეს საგამოძიებო უწყებაში მესამე დირექტორი გამოცხადდება და პრაქტიკულად, ამით ამოიწურება მათი გამოცხადების პროცესი პროკურატურაში. დიდი ალბათობით, ნიკოლოზ ასანიძის პოზიციაც იგივე იქნება, რაც სხვა დირექტორებმა, ასევე სავარაუდოდ „ომეგა ჯგუფის" წინააღმდეგ მოქმედმა პირებმა დააფიქსირეს, რომ სასამართლოში გამოკითხვისას მისცეს სრული და ამომწურავი ინფორმაცია“, - აღნიშნა გიორგი ფანცულაიამ.

შეგახსენებთ, საქმე ეხება „ომეგა ჯგუფთან" დაკავშირებით მედიაში გავრცელებულ აუდიოჩანაწერებს, რაზეც თბილისის პროკურატურამ გამოძიება დაიწყო. საქმე 180-ე მუხლითაა აღძრული, რაც თაღლითობას გულისხმობს.