პოლიტიკა

ოჯახის წევრის გარდაცვალების გამო სოციალურად დაუცველ ოჯახს ხელახალი გადაფასების პერიოდში, სოციალური დახმარება აღარ შეუწყდება - დავით სერგეენკო

შრომის, ჯანმრთელობისა და სოციალური დაცვის მინისტრის, დავით სერგეენკოს ინფორმაციით, სოციალურად დაუცველ ოჯახს, ოჯახის წევრის გარდაცვალების შემთხვევაში, ხელახალი გადაფასების პერიოდში, სოციალური დახმარება აღარ შეუწყდება.

მან განაცხადა, რომ მთავრობის დღევანდელ სხდომაზე მიზნობრივი სოციალური დახმარებების მეთოდოლოგიაში ცვლილების შესახებ იმსჯელეს. არსებული პრაქტიკით, ოჯახის წევრების დემოგრაფიული მონაცემების ცვლილების შემთხვევაში, ოჯახის სოციალური მდგომარეობა თავიდან ფასდება. გადაფასების პერიოდში კი, სოციალური დახმარება წყდება. გადაფასების პერიოდი, ხშირად სამ თვემდე გრძელდება. იმ შემთხვევაში კი, თუ ოჯახს იგივე ქულა მიენიჭება, შეწყვეტილი დახმარება გრძელდება და წინა თვეები კომპენსირდება.

სერგეენკომ აღნიშნა, რომ არსებული სისტემა მტკივნეულია ოჯახის წევრის გარდაცვალების შემთხვევაში, თუმცა მასში ცვლილებები შედის.

„გამომდინარე იქიდან, რომ დიდი უკმაყოფილება იყო ამ მხრივ, რადგანაც ოჯახს წევრის გარდაცვალებით ისედაც დიდი ტრაგედია აქვს და ანალიზმაც აჩვენა, რომ დახმარების შეწყვეტის შემდეგ 50 %-ის შემთხვევაში, ისევ ინიშნება სოციალური დახმარება, მთავრობა ცვლილებას დათანხმდა.

ცვლილების თანახმად, ოჯახის წევრის გარდაცვალების შემთხვევაში აღარ შეწყდება სოციალური დახმარება. მოხდება გადაფასება და თუ აღმოჩნდა, რომ ქულა გაიზარდა, დახმარება მხოლოდ იმ შემთხვევაში მოიხსნება, სხვა შემთხვევაში, წყვეტა არ იქნება“, – განაცხადა ჯანდაცვის მინისტრმა.