სამართალი

ნუცუბიძის პლატოზე მომხდარი ინციდენტის თვითმხილველი დაკითხვაზე მეორედ დაიბარეს

ნუცუბიძის პლატოზე მომხდარი ინციდენტის თვითმხილველი ნოდარ შანიძე მთავარ პროკურატურაში დაკითხვაზე მეორედ დაიბარეს.

ნოდარ შანიძე ის ადამიანია, რომლის ვიდეო გაავრცელა შინაგან საქმეთა სამინისტრომ, სადაც შანიძე ამბობს, რომ გარდაცვლილი დამოკიდებული იყო ფსიქოტროპულ ნივთიერებებზე.

როგორც შანიძის ადვოკატმა მუხრან ღურწკაიამ მედიას პროკურატურაში შესვლამდე განუცხადა, მათთვის უცნობია, თუ რა შეკითხვები აქვს საგამოძიებო უწყებას.

„გამომძიებელი დაგვიკავშირდა, დაბარებული ვართ დაკითხვაზე მაგრამ, რა შეკითხვები აქვთ, ჯერჯერობით ჩვენთვის უცნობია, დაბარებულია დაკითხვაზე პავლიაშვილის გარდაცვალებასთან დაკავშირებით. ვერ გეტყვით ახალ გარემოებას. ჩემთვის პირადად უცნობია, ვინ რას იღებდა და ჩემი დაცვის ქვეშ მყოფთანაც ამ შემთხვევაში არ მქონია დიდი ხნის კონსულტაცია, ამ წუთას ჩავერთე ამ საქმეში, დეტალურად გავერკვევი, მივიღებ დეტალურ ინფორმაციას და ამის შემდეგ მოგაწვდით უფრო დეტალურ ინფორმაციას“ - განაცხადა ადვოკატმა მუხრან ღურწკაიამ.

25 ოქტომბერს, ნუცუბიძის პლატოზე ადმინისტრაციული წესით დაკავებისას 33 წლის პაატა პავლიაშვილი გარდაიცვალა.

მთავარმა პროკურატურამ მომხდარზე გამოძიება 116 მუხლით დაიწყო, რაც სიცოცხლის გაუფრთხილებლობით მოსპობას გულისმხობს.

მონიკა დავლიანიძე